കമ്പളക്കാട്: സുമനസുകളുടെ സഹായം സ്വീകരിക്കാനാവാതെ അനന്തരാജ് യാത്രയായി. ലിവര്‍കാന്‍സര്‍ ബാധിച്ച് നാല് മാസമായി കിടപ്പിലായിരുന്ന അനന്തരാജിന്റെയും ശരീരമാസകലം വേദനയുമായി കഴിയുന്ന 23 കാരി മകള്‍ രമ്യയുടെയും ദയനീയകഥ സുപ്രഭാതം കഴിഞ്ഞദിവസങ്ങളില്‍ റിപ്പോര്‍ട്ട് ചെയ്തിരുന്നു.
വാര്‍ത്ത വന്നതിനെതുടര്‍ന്ന് അനന്തരാജിന്റെ വീട്ടിലേക്ക് സുമനസുകളുടെ സഹായ പ്രവാഹമായിരുന്നു. അതില്‍ ഏറ്റവും പ്രധാനമായത് കമ്പളക്കാട് ജനമൈത്രി പൊലിസിന്റെതായിരുന്നു. കമ്പളക്കാട് പൊലിസ് അധികാരികള്‍ അനന്തരാജിനെ സന്ദര്‍ശിക്കുകയും സഹായം നല്‍കുകയും ചെയ്തിരുന്നു. പക്ഷെ എല്ലാവരേയും നിരാശരാക്കി അനന്തരാജ് വേദനകളില്ലാത്ത ലോകത്തേക്ക് യാത്രയായി. ഇനി ഈ വീട്ടില്‍ ഇദ്ദേഹത്തിന്റെ അജ്ഞാത രോഗ ബാധയാല്‍ സംസാരശേഷി പൂര്‍ണമായും നഷ്ടപ്പെട്ട മകള്‍ രമ്യയും മാതാവും സഹോദരനും മാത്രം. ഈ കുടുബത്തിന്റെ ഏകവരുമാന മാര്‍ഗമാണ് ഇപ്പോള്‍ നിലച്ചത്. മൂത്ത മകനായ അജേഷിന്റെ ചുമലിലാണ് ഇനി കുടുംബം. എത്ര കഷ്ടടപ്പെട്ടാലും പെങ്ങളുടെ ചികിത്സ മുടക്കില്ലെന്നാണ് അജേഷിന്റെ പക്ഷം. സുമനസുകളുടെ സഹായങ്ങളാണ് കുടുംബത്തിന്റെ പ്രതീക്ഷ.