വെട്ടത്തൂര്‍:  ഉത്പാദന മേഖലക്കും മാലിന്യ നിര്‍മാര്‍ജനത്തിനും പ്രാമുഖ്യം നല്‍കി വെട്ടത്തൂര്‍ പഞ്ചായത്ത് വികസന  സെമിനാര്‍. നാലു കോടിയുടെ വികസന നിര്‍ദ്ദേശങ്ങള്‍ അടങ്ങിയ 2016- 17 വര്‍ഷത്തേക്കുള്ള കരട്  പദ്ധതിക്കാണ് വികസന സെമിനാര്‍ അംഗീകാരം നല്‍കിയത്. സെമിനാര്‍ തേലക്കാട് ഗ്രേസ് ഇംഗ്ലീഷ്  സ്‌കൂളില്‍ മഞ്ഞളാംകുഴി അലി എംഎല്‍എ ഉദ്ഘാടനം ചെയ്തു.
രൂക്ഷമായ കുടിവെള്ള പ്രശ്‌നത്തിന് ശാശ്വത പരിഹാരം, ജൈവകൃഷി ഉള്‍പ്പെടെയുള്ള കാര്‍ഷിക മേഖലയുടെ സമഗ്ര വികസനം, സമ്പൂര്‍ണ ശുചിത്വ യജ്ഞത്തിന്റെ ഭാഗമായി മുഴുവന്‍ കുടുംബങ്ങള്‍ക്കും ടോയ്‌ലറ്റ് സൗകര്യം, പട്ടികജാതി, പട്ടിക വര്‍ഗക്കാര്‍ ഉള്‍പ്പെടെയുള്ള പ്രത്യേക പരിഗണന അര്‍ഹിക്കുന്നവരുടെ ഉന്നമനം, അങ്കണവാടി  നവീകരണം, ആരോഗ്യവിദ്യാഭ്യാസ മേഖലയിലെ ഭൗതിക സൗകര്യങ്ങള്‍ മെച്ചപ്പെടുത്തല്‍, ഗ്രാമീണ  റോഡുകളുടെ വികസനം എന്നിവയാണ് വാര്‍ഷിക പദ്ധതിയില്‍ ഉള്‍പ്പെടുത്തിയിട്ടുള്ളത്.
  പഞ്ചായത്ത്  പ്രസിഡന്റ് അന്നമ്മ വള്ളിയാംതടത്തില്‍ അധ്യക്ഷയായി. ജില്ലാപഞ്ചായത്ത് സ്ഥിരംസമിതി ചെയര്‍മാന്‍ വി.സുധാകരന്‍  മുഖ്യപ്രഭാഷണം നടത്തി. എസ്.എസ്.എല്‍.സി, പ്ലസ്ടു പരീക്ഷകളിലെ സമ്പൂര്‍ണ എപ്ലസ് വിജയികളേയും  ചടങ്ങില്‍ ആദരിച്ചു.
പഞ്ചായത്ത് സെക്രട്ടറി പി.വിനോദ്കുമാര്‍ പദ്ധതി അവലോകനവും വികസന സ്ഥിരംസമിതി ചെയര്‍പേഴ്‌സണ്‍ എന്‍.അജിത പദ്ധതിയുടെ അവതരണവും നടത്തി. ബ്ലോക്ക് പഞ്ചായത്തംഗങ്ങളായ  സി.പി.അബ്ദുള്ള, കരുവാത്ത് ചന്ദ്രിക, പഞ്ചായത്ത് സ്ഥിരംസമിതി അംഗങ്ങളായ കെ.റഫീഖ ബഷീര്‍,  പി.ഹരീഷ് ബാബു, മറ്റു ജനപ്രതിനിധികള്‍ സംസാരിച്ചു.