കോഴിക്കോട്: മെഗാ അദാലത്തില്‍ പരിഗണിച്ച 70 പരാതികളില്‍ 27 എണ്ണം വനിതാ കമ്മിഷന്‍ തീര്‍പ്പാക്കി. 11 കേസുകളില്‍ പൊലിസിന്റെയും വിവിധ വകുപ്പുകളുടെയും റിപ്പോര്‍ട്ട് തേടി. നാലു കേസുകളില്‍ ആര്‍.ഡി.ഒ.യുടെ റിപ്പോര്‍ട്ട് ആവശ്യപ്പെടുകയും 19 പരാതികള്‍ അടുത്ത സിറ്റിങ്ങിലേക്ക് മാറ്റിവയ്ക്കുകയും ചെയ്തു. സംസ്ഥാന വനിതാ കമ്മിഷന്‍ അംഗം അഡ്വ. എം.എസ് താരയുടെ നേതൃത്വത്തില്‍ ജില്ലാ പഞ്ചായത്ത് ഹാളിലായിരുന്നു കമ്മിഷന്റെ മെഗാ അദാലത്ത്.
ദാമ്പത്യ-കുടുംബ പ്രശ്‌നങ്ങള്‍, അയല്‍ക്കാര്‍ തമ്മിലുള്ള പ്രശ്‌നങ്ങള്‍ തുടങ്ങിയവയാണ് പരിഗണിച്ച കേസുകളില്‍ അധികവും. കുടുംബ പ്രശ്‌നം സംബന്ധിച്ച മൂന്നു കേസുകളില്‍ കക്ഷികള്‍ക്ക് കൗണ്‍സലിങ് നല്‍കുന്നതിന് തീരുമാനമായി. സ്വത്ത് സംബന്ധമായ രണ്ടു പരാതികളും പരിഗണനയ്ക്ക് വന്നു.
മരിച്ച മകന്റെ നിരാലംബയായ ഭാര്യക്കും മക്കള്‍ക്കും സ്വത്തില്‍ ഓഹരി നല്‍കാന്‍ തയാറാകാത്ത വയോധികയായ മാതാവിനെതിരേ ലഭിച്ച പരാതിയില്‍ മറ്റു മക്കളോട് കൂടിയാലോചിച്ച് സ്വത്ത് നല്‍കുന്ന കാര്യത്തില്‍ ധാരണയിലെത്തി അടുത്ത സിറ്റിങ്ങില്‍ ഹാജരാകാന്‍ കമ്മിഷന്‍ നിര്‍ദേശം നല്‍കി. 65 സെന്റ് സ്ഥലത്തിന് ഉടമയാണ് എതിര്‍കക്ഷിയായ സ്ത്രീ. പരാതിക്കാരിയും മക്കളും വാടക വീട്ടിലാണ് താമസിക്കുന്നത്.
ഗാര്‍ഹിക പീഡനം ഉള്‍പ്പെടെയുള്ള ആറു കേസുകളില്‍ കക്ഷികള്‍ ഹാജരാകാത്തതിനാല്‍ പൊലിസില്‍ അറിയിച്ച് പ്രതികളെ വരുത്താന്‍ നടപടിയെടുക്കുമെന്ന് കമ്മിഷന്‍ അംഗം പറഞ്ഞു. കുടുംബ പ്രശ്‌നങ്ങളില്‍ കോടതികളെ സമീപിച്ച ശേഷം വനിതാ കമ്മിഷനില്‍ വരുന്നതില്‍ കാര്യമില്ലെന്നും കോടതി നടപടികളിലേക്ക് നീങ്ങുന്നതിനു മുന്‍പ് കമ്മിഷന്റെ മധ്യസ്ഥതയില്‍ പ്രശ്‌നം പരിഹരിക്കാന്‍ ശ്രമിക്കുന്നതാണ് ഉചിതമെന്നും അവര്‍ വ്യക്തമാക്കി. സിറ്റിങ്ങില്‍ ലീഗല്‍ പാനല്‍ അംഗങ്ങളായ അഡ്വ. എ. ജെമിനി, അഡ്വ. റീന സുകുമാരന്‍, വനിതാ സെല്‍ എസ്.ഐ എ.കെ ജമീല പങ്കെടുത്തു.