ചെറുപുഴ: രാജ്യത്തെ ഏറ്റവും മികച്ച ട്രെയിനിങ് സെന്ററായി തിരഞ്ഞെടുക്കപ്പെട്ട പെരിങ്ങോം സി.ആര്‍.പി.എഫ് ക്യാംപിന് പൗരാവലിയുടെയും ക്യാംപ് അംഗങ്ങളുടെയും വര്‍ണാഭമായ സ്വീകരണം. കഴിഞ്ഞയാഴ്ച ഡല്‍ഹിയില്‍ നടന്ന ചടങ്ങില്‍ പെരിങ്ങോം സി.ആര്‍.പി.എഫ് ഡി.ഐ.ജി പി.എം.ജെ വിജയ് ഏറ്റുവാങ്ങിയ ട്രോഫി നൂറുകണക്കിന് ആളുകളുടെയും ജവാന്മാരുടെയും സ്വീകരണം ഏറ്റുവാങ്ങി ക്യാംപില്‍ എത്തിച്ചു.
ട്രോഫിയുമായി ഡല്‍ഹിയില്‍ നിന്നു പയ്യന്നൂര്‍ റെയില്‍വേ സ്റ്റേഷനില്‍ എത്തിയ സേനാ കമാന്‍ഡന്റിനെയും ജവാന്മാരെയും ജീപ്പില്‍ സ്വീകരിച്ചാനയിച്ചു.
അരവഞ്ചാല്‍ ടൗണിലെ പൗരാവലി പൊതുയോഗം ക്യാംപ് കമാന്റിങ് ഓഫിസര്‍ ഫിറോസ് ഉദ്ഘാടനം ചെയ്തു. ചീഫ് മെഡിക്കല്‍ ഓഫിസര്‍ പി.ജി രവീന്ദ്രനാഥ് അധ്യക്ഷനായി.
പെരിങ്ങോം പഞ്ചായത്ത് പ്രസിഡന്റ് പി. നളിനി, പി.വി തമ്പാന്‍, കരുണാകരന്‍, ശ്രീനാഥ്, അഭിലാഷ് വി. ജോസ് സംസാരിച്ചു.