കോഴിക്കോട്: സി.പി.എം ജില്ലാ കമ്മിറ്റി ഓഫിസിനു നേരെ ബോംബെറിഞ്ഞ് സെക്രട്ടറിയെ വധിക്കാന്‍ ശ്രമിച്ച കേസില്‍ അന്വേഷണം നടത്തുന്ന സംഘത്തിന് നാഥനില്ല. അന്വേഷണം നടത്തിയ ക്രൈംബ്രാഞ്ച് എച്ച്.എച്ച്.ഡബ്ല്യു ഡിവൈ.എസ്.പി വിപിന്‍ദാസിനെ കഴിഞ്ഞ ദിവസം സര്‍ക്കാര്‍ സ്ഥലം മാറ്റിയിട്ടും പകരക്കാരന്റെ നിയമനം നീളുകയാണ്. വിപിന്‍ദാസിനെ സംസ്ഥാന രഹസ്യാന്വേഷണ വിഭാഗം പാലക്കാട് യൂനിറ്റിലേക്കാണ് (എസ്.ബി.സി.ഐ.ഡി) മാറ്റിയത്. സാധാരണമായ സ്ഥലംമാറ്റ പട്ടികയിലുള്‍പ്പെട്ടതാണ് വിപിന്‍ദാസിന്റേത്. അതേസമയം വിപിന്‍ദാസ് പോകുമ്പോഴുള്ള ഒഴിവിലേക്കു നിയമനം നടത്താതെ ക്രൈംബ്രാഞ്ച് എച്ച്.എച്ച്.ഡബ്ല്യുന്റെ വയനാട് ഡിവൈ.എസ്.പി കെ.കെ രാധാകൃഷ്ണന് ചുമതല നല്‍കിയിരിക്കുകയാണ്.
ബോംബേറ് കേസും വധശ്രമകേസും ക്രൈംബ്രാഞ്ച് ഏറ്റെടുത്തതിനു ശേഷം വിപിന്‍ദാസിന്റെ നേതൃത്വത്തില്‍ ഓഫിസും പരിസരവും പരിശോധിക്കുകയും മൊഴി രേഖപ്പെടുത്തുകയും ചെയ്തിരുന്നു. തുടര്‍ന്നുള്ള അന്വേഷണം ഇനി പകരക്കാരനായെത്തിയ ഡിവൈ.എസ്.പി.യുടെ ചുമതലയാണ്. അതേസമയം വയനാട് യൂനിറ്റിനു കീഴിലുള്ള കേസുകള്‍ക്കിടയില്‍ ബോംബേറ് കേസിന്റെ അന്വേഷണം വേഗത്തിലാക്കാന്‍ കഴിയുമോയെന്ന ആശങ്ക ഉയര്‍ന്നിട്ടുണ്ട്.
ഇക്കഴിഞ്ഞ ജൂണ്‍ രണ്ടാം വാരമായിരുന്നു ക്രിസ്ത്യന്‍ കോളജിന് സമീപമുള്ള സി.പി.എം ജില്ലാ കമ്മിറ്റി ഓഫിസായ സി.എച്ച് കണാരന്‍ സ്മാരക മന്ദിരത്തിനു നേരെ അജ്ഞാതര്‍ ബോംബെറിഞ്ഞത്. തുടര്‍ന്ന് ലോക്കല്‍ പൊലിസിലെ നോര്‍ത്ത് അസി. കമ്മിഷണര്‍ ഇ.പി. പൃഥ്വിരാജിന്റെ നേതൃത്വത്തിലുള്ള പത്തംഗസംഘം അന്വേഷിച്ചെങ്കിലും കാര്യമായ പുരോഗതിയുണ്ടായില്ല.
തുടര്‍ന്ന് കേസ് ക്രൈംബ്രാഞ്ചിന് കൈമാറുകയായിരുന്നു. അതേസമയം സംഭവം നടന്ന് അഞ്ചു ദിവസത്തിനുള്ളില്‍ അന്വേഷണത്തിനു മേല്‍നോട്ടം വഹിച്ചിരുന്ന സിറ്റി പൊലിസ് കമ്മിഷണര്‍ ജെ. ജയനാഥിനെ മാറ്റിയത് ഏറെ ചര്‍ച്ചയായിരുന്നു.