വൈക്കം: നഗരത്തില്‍ തെരുവില്‍ അന്തിയുറങ്ങുന്നവരുടെ പുനരധിവാസം ലക്ഷ്യമിട്ട് നഗരസഭ നടത്തുന്ന പദ്ധതികള്‍ക്ക് മുന്നോടിയായുള്ള സര്‍വേ നടപടികള്‍ തുടങ്ങി.
കേന്ദ്രസര്‍ക്കാര്‍ കുടുംബശ്രീ വഴി നടപ്പിലാക്കുന്ന ദേശീയ നഗര ഉപജീവന ദൗത്യത്തിന്റെ ഭാഗമായി നഗരത്തിലെ ഭവനരഹിതരെ പുനരധിവസിപ്പിക്കുന്നതിന് പദ്ധതികള്‍ ആസൂത്രണം ചെയ്യുകയെന്ന ലക്ഷ്യത്തോടെ നഗരസഭ ക്ഷേമകാര്യസമിതിയുടെ നേതൃത്വത്തില്‍ എന്‍.യു.എല്‍.എം സിറ്റി മിഷന്‍ മാനേജ്‌മെന്റ് യൂനിറ്റും നഗരസഭയുടെ ആരോഗ്യവിഭാഗവുമാണ് സര്‍വേ നടപടികള്‍ നടത്തുന്നത്. ഭവനരഹിതരായി തെരുവില്‍ അന്തിയുറങ്ങുന്നവരുടെ വിശദാംശങ്ങള്‍ പഠിച്ച് അവര്‍ക്ക് അനുയോജ്യമായ കൂടുതല്‍ സൗകര്യങ്ങള്‍ ഒരുക്കുവാനാണ് സര്‍വേ ലക്ഷ്യമിടുന്നത്. സര്‍വേയിലൂടെ ഇതുവരെ ഏഴു പേരെയാണ് തെരുവില്‍ അന്തിയുറങ്ങുന്നവരായി കണ്ടെത്തിയിരിക്കുന്നത്. ഇങ്ങനെ വിവിധ വിഭാഗങ്ങളിലുള്ളവര്‍ക്ക് അനുയോജ്യമായ രീതിയില്‍ പുനരധിവാസ പദ്ധതികള്‍ ആസൂത്രണം ചെയ്യുവാനാണ് നഗരസഭ ലക്ഷ്യമിടുന്നതെന്ന് ചെയര്‍ പേഴ്‌സണ്‍ പറഞ്ഞു. സര്‍വേയ്ക്ക് നഗരസഭാ ചെയര്‍പേഴ്‌സണ്‍ എസ്. ഇന്ദിരാദേവി, സ്റ്റാന്റിങ് കമ്മിറ്റി ചെയര്‍മാന്‍മാരായ രോഹിണിക്കുട്ടി അയ്യപ്പന്‍, ബിജു കണ്ണേഴത്ത്, കൗണ്‍സിലര്‍മാരായ അഡ്വ. അംബരീഷ് ജി വാസു, എ.സി മണിയമ്മ, സി.ഡി.എസ് ചെയര്‍പേഴ്‌സണ്‍ വത്സല, മുനിസിപ്പല്‍ ഉദ്യോഗസ്ഥരായ സന്ധ്യാ ശിവന്‍, രഞ്ജിനി മോള്‍, സല്‍പ്രിയ, കെ.സി മുരളീധരന്‍ എന്നിവര്‍ നേതൃത്വം നല്‍കി.