തിരുവനന്തപുരം: ഗുരുവായൂരില്‍ നടന്ന വിവാഹം വിവാദമായ സംഭവത്തില്‍ പെണ്‍കുട്ടിയെ അപമാനിക്കുന്ന തരത്തില്‍ സോഷ്യല്‍ മീഡിയയില്‍ പ്രചാരണം നടത്തുന്നവര്‍ക്കെതിരേ നടപടി. ഇത്തരക്കാര്‍ക്കെതിരേ നടപടുയെടുക്കാന്‍ വനിതാ കമ്മിഷന്‍ പൊലിസിനോട് നിര്‍ദേശിച്ചിട്ടുണ്ട്.

സോഷ്യല്‍ മീഡിയയില്‍ പെണ്‍കുട്ടിയുടെ ഫോട്ടോയുള്‍പ്പെടെ വ്യാപകമായി പ്രചരിപ്പിക്കുകയും അപമാനിക്കാന്‍ ശ്രമിക്കുകയും ചെയ്യുന്നുണ്ടെന്ന പരാതിയെത്തുടര്‍ന്നാണ് കമ്മിഷന്റെ ഇടപെടല്‍.

നേരത്തെ സ്ഥലം എം.എല്‍.എ കെ.വി അബ്ദുല്‍ ഖാദറും സംഭവത്തില്‍ ഇടപെട്ട് രംഗത്തു വന്നിരുന്നു. യുവതി കാമുകനൊപ്പം പോയിട്ടില്ലെന്നും സോഷ്യല്‍ മീഡിയയില്‍ പ്രചരിക്കുന്ന കാര്യങ്ങള്‍ വസ്തുതാ വിരുദ്ധമാണെന്നുമാണ് അദ്ദേഹം പറഞ്ഞത്്.

ഇരു കൂട്ടരുടെയും ബന്ധുക്കള്‍ തമ്മിലുള്ള അഭിപ്രായ വ്യത്യാസമാണ് വിവാഹം മുടങ്ങാന്‍ കാരണമായതെന്നും അദ്ദേഹം പറഞ്ഞു. കഴിഞ്ഞയാഴ്ചയാണ് വിവാഹം കഴിഞ്ഞയുടനെ ഗുരുവായൂര്‍ അമ്പലത്തില്‍ വച്ച് നവവധു കാമുകനോടൊപ്പം പോയെന്ന തരത്തില്‍ ഫോട്ടോയടക്കം പ്രചരിച്ചത്.