കൊച്ചി: വീടിനു സുരക്ഷയൊരുക്കാന്‍ നിയോഗിക്കപ്പെട്ട പൊലിസുകാരുടെ ടെന്റ് കത്തിച്ചെന്ന കേസില്‍ നെയ്യാറ്റിന്‍കര മുന്‍ എം.എല്‍.എ ശെല്‍വരാജിനെ ബുധനാഴ്ച വരെ അറസ്റ്റ് ചെയ്യരുതെന്ന് ഹൈക്കോടതി നിര്‍ദേശിച്ചു. ശെല്‍വരാജ് നല്‍കിയ മുന്‍കൂര്‍ ജാമ്യാപേക്ഷയിലാണ് ഹൈക്കോടതിയുടെ ഇടക്കാല ഉത്തരവ്. സി.പി.എം സ്ഥാനാര്‍ഥിയായി മത്സരിച്ചു ജയിച്ച ശെല്‍വരാജ് 2012 ല്‍ കോണ്‍ഗ്രസിലേക്ക് മാറി. തുടര്‍ന്ന് നെയ്യാറ്റിന്‍കര മണ്ഡലത്തില്‍ നടത്തിയ ഉപതെരഞ്ഞെടുപ്പിലും ശെല്‍വരാജ് വിജയിച്ചിരുന്നു. സര്‍ക്കാര്‍ അദ്ദേഹത്തിന്റെ വീടിന് പൊലിസ് സംരക്ഷണം ഏര്‍പ്പെടുത്തിയിരുന്നു. പിന്നീട് ഭീഷണിയൊഴിഞ്ഞതോടെ സുരക്ഷ ഒഴിവാക്കി. എന്നാല്‍ ടെന്റ് മാറ്റിയിരുന്നില്ല. 2013 മാര്‍ച്ച് 29 ന് രാത്രി എട്ടരയോടെ ടെന്റ് കത്തി നശിച്ചു. സംഭവത്തില്‍ പ്രതികളെ കണ്ടെത്താന്‍ കഴിയാത്തതിനാല്‍ അന്വേഷണം അവസാനിപ്പിച്ചു. ഇടതു സര്‍ക്കാര്‍ അധികാരത്തില്‍ വന്നതോടെ കേസ് വീണ്ടും ക്രൈംബ്രാഞ്ചിനു വിട്ടു. സംഭവ സമയത്ത് തന്റെ ഗണ്‍മാനായിരുന്ന പൊലിസുകാരനെ ക്രൈംബ്രാഞ്ച് നാലു തവണ ചോദ്യം ചെയ്‌തെന്നും ടെന്റ് കത്തിച്ച സംഭവത്തില്‍ ശെല്‍വരാജിന് പങ്കുണ്ടെന്ന് മൊഴി നല്‍കാന്‍ ഭീഷണിപ്പെടുത്തിയെന്നും ഹരജിയില്‍ പറയുന്നു.