കല്‍പ്പറ്റ: പ്രളയക്കെടുതിയിലും ഉരുള്‍പൊട്ടലിലും പെട്ട് വീടും സ്ഥലവും നഷ്ടപ്പെട്ട് പെരുവഴിയിലായ ആദിവാസികളും കര്‍ഷകരും സര്‍ക്കാറിന്റെ വാഗ്ദാന ലംഘനത്തില്‍ കുടുങ്ങി നട്ടം തിരിയുകയാണെന്ന് കേരളാ കോണ്‍ഗ്രസ് ജില്ലാ പ്രസിഡന്റ് അനില്‍ കരണി കുറ്റപ്പെടുത്തി.
പുനരധിവാസത്തിന് യോജിച്ച സ്ഥലം കണ്ടെത്തി വീട് വച്ച് നല്‍കുന്നതിന് ബന്ധപ്പെട്ട അധികാരികള്‍ ശ്രദ്ധിക്കുന്നില്ല. ഇതിനെതിരെ വ്യാപകമായ പരാതി ഉയര്‍ന്നിട്ടും അനങ്ങാപ്പാറ നയമാണ് സ്വീകരിക്കുന്നത്. വളരെ പിന്നോക്കം നില്‍ക്കുന്ന തിരുനെല്ലി പഞ്ചായത്തിലെ തൃശിലേരിയില്‍ ഉരുള്‍പൊട്ടല്‍ മൂലം വന്‍ നാശം സംഭവിച്ച പ്ലാമൂല, കെടച്ചി തുടങ്ങിയ ഭാഗങ്ങളില്‍ അധികൃതര്‍ തിരിഞ്ഞു നോക്കുന്നില്ല എന്ന് നാട്ടുകാര്‍ക്ക് പരാതിയുണ്ട്.
തകര്‍ന്ന വീടുകള്‍ക്ക് പകരം താല്‍ക്കാലിക ഷെഡുകള്‍ നിര്‍മിച്ചു നല്‍കാമെന്ന് ജില്ലാ കലക്ടര്‍ ഉറപ്പു നല്‍കിയെങ്കിലും പാലിച്ചിട്ടില്ല. മിക്ക കുടുംബങ്ങളും കന്നുകാലികളെ വളര്‍ത്തി ഉപജീവനം നടത്തുന്നവരാണ്.
തകര്‍ത്ത വീടുകള്‍ക്കൊപ്പം തൊഴുത്തും നഷ്ടപ്പെട്ടവരുണ്ട്. എന്നാല്‍ ഇവരെ സഹായിക്കാന്‍ ജനപ്രതിനിധികളും ജില്ലാ ഭരണകൂടവും തയാറാകുന്നില്ല. വിവേചനത്തിന് എത്രയും പെട്ടന്ന് പരിഹാരം കണ്ടില്ലെങ്കില്‍ സമരത്തിനിറങ്ങാന്‍ നാട്ടുകാര്‍ക്കൊപ്പം കേരളാ കോണ്‍ഗ്രസും മുന്‍നിരയിലുണ്ടാകുമെന്ന് അനില്‍ കരണി പ്രസ്താവനയില്‍ വ്യക്തമാക്കി.