റിയാദ്: സഊദിയിലുണ്ടായ വാഹനാപകടത്തില്‍ മലയാളി വീട്ടമ്മയും മകനും മരിച്ചു. ഖുന്‍ഫുദയില്‍ ജോലി ചെയ്യുന്ന വേങ്ങര കോട്ടുമല സ്വദേശി പറ്റൊടുവില്‍ ഇസ്ഹാഖിന്റെ ഭാര്യ ഷഹറാബാനു (30), മകന്‍ മുഹമ്മദ് ഷാന്‍ (11) എന്നിവരാണ് മരിച്ചത്. അപകടത്തില്‍ പരിക്കേറ്റ ഇസ്ഹാഖും ചെറിയ കുട്ടിയും ഇതേ ആശുപത്രയില്‍ ചികിത്സയിലാണ്. ഇസ്ഹാഖാണ് കാര്‍ ഓടിച്ചിരുന്നത്.
ഞായറാഴ്ച രാവിലെ ഖുന്‍ഫുദയിലാണ് അപകടം ഉണ്ടായത്. അല്‍ ഖൗസില്‍ നിന്ന് ഹാലിയിലേക്ക് പോകുമ്പോള്‍ ഇവര്‍ സഞ്ചരിച്ചിരുന്ന കാര്‍ മറ്റൊരു വാഹനത്തെ ഇടിക്കുകയായിരുന്നു. മൃതദേഹം ഖുന്‍ഫുദ ജനറല്‍ ആശുപത്രിയില്‍. രണ്ടുദിവസം മുമ്പാണ് കുടുംബം സന്ദര്‍ശക വിസയില്‍ സഊദിയില്‍ എത്തിയത്.