ചെന്നൈ: പ്രധാനമന്ത്രിയാകാന്‍ എന്തുകൊണ്ടും യോഗ്യന്‍ രാഹുല്‍ ഗാന്ധിയാണെന്ന് ഡി.എം.കെ അധ്യക്ഷന്‍ എം.കെ സ്റ്റാലിന്‍. മുന്‍ തമിഴ്‌നാട് മുഖ്യമന്ത്രി എം. കരുണാനിധിയുടെ പ്രതിമ അനാച്ഛാദനം ചെയ്യുന്ന ചെന്നൈയിലെ പാര്‍ട്ടി ആസ്ഥാനമായ അണ്ണാ അറിവാലയത്തില്‍ പ്രതിപക്ഷ ഐക്യത്തിന്റെ വേദിയായ ചടങ്ങിലാണ് സ്റ്റാലിന്റെ അഭിപ്രായപ്രകടനം.
മോദിയുടെ നേതൃത്വത്തിലുള്ള ഫാസിസ്റ്റ് സര്‍ക്കാരിനെ പരാജയപ്പെടുത്താനുള്ള കഴിവ് രാഹുലിനുണ്ട്. അദ്ദേഹത്തിന്റെ കൈകള്‍ക്ക് ശക്തി നല്‍കുകയെന്നതാണ് നമുക്കു ചെയ്യാനുള്ള ഏറ്റവുംവലിയ നടപടി. രാഹുലിന്റെ നേതൃത്വത്തില്‍ രാജ്യത്തെ രക്ഷിക്കുകയെന്നതാണ് അനിവാര്യമായതെന്നും അദ്ദേഹം ആവര്‍ത്തിച്ചു.
ഹിന്ദി ഹൃദയഭൂമിയിലുണ്ടായ വന്‍ വിജയത്തിനുപിന്നാലെ രാഹുലും സോണിയയും ഇന്നലെ ചെന്നൈയിലെത്തി. ഡി.എം.കെ മുന്‍ അധ്യക്ഷനും മുന്‍ മുഖ്യമന്ത്രിയുമായ എം. കരുണാനിധിയുടെ പ്രതിമ സോണിയാ ഗാന്ധി അനാച്ഛാദനം ചെയ്തു. ഈ ചടങ്ങ് പ്രതിപക്ഷത്തിന്റെ ശക്തി വിളിച്ചോതുന്നതുകൂടിയായിരുന്നു.
ആന്ധ്രാപ്രദേശ് മുഖ്യമന്ത്രി എന്‍. ചന്ദ്രബാബു നായിഡു, കേരള മുഖ്യമന്ത്രി പിണറായി വിജയന്‍, പുതുച്ചേരി മുഖ്യമന്ത്രി വി. നാരായണ സ്വാമി തുടങ്ങിയവരും ചടങ്ങില്‍ പങ്കെടുത്തു.
പരിപാടിയില്‍ പങ്കെടുക്കാന്‍ രജനികാന്ത്, ബി.ജെ.പി എം.പി ശത്രുഘ്‌നന്‍ സിന്‍ഹ എന്നിവരെത്തിയതും ശ്രദ്ധേയമായി.
2004 മുതല്‍ കോണ്‍ഗ്രസും ഡി.എം.കെയും സഖ്യകക്ഷികളാണ്. എന്നാല്‍ 2014ലെ ലോക്‌സഭാ തെരഞ്ഞെടുപ്പിനു തൊട്ടുമുന്‍പാണ് സഖ്യത്തില്‍ വിള്ളല്‍ വീണത്. ഇത് ഇരു പാര്‍ട്ടികള്‍ക്കും വലിയ ക്ഷീണം ചെയ്യുകയും ചെയ്തിരുന്നു. രാജസ്ഥാന്‍, മധ്യപ്രദേശ്, ഛത്തിസ്ഗഡ് സംസ്ഥാനങ്ങളിലെ കോണ്‍ഗ്രസിന്റെ മുഖ്യമന്ത്രിമാരുടെ സത്യപ്രതിജ്ഞാ ചടങ്ങിലും പ്രതിപക്ഷ നേതാക്കള്‍ പങ്കെടുക്കും.