ഓമശ്ശേരി: സമീക്ഷ ആര്‍ട്‌സ് ആന്‍ഡ് സ്‌പോര്‍ട്‌സ് സെന്റര്‍ ഉദ്ഘാടനവും ഇന്ത്യന്‍ ഫുട്‌ബോള്‍ താരം അനസ് എടത്തൊടികയ്ക്ക് സ്വീകരണവും നല്‍കി. 1990-ല്‍ സ്ഥാപിതമായ സമീക്ഷ ആര്‍ട്‌സ് ആന്‍ഡ് സ്‌പോര്‍ട്‌സ് സെന്ററിന്റെ നവീകരിച്ച ഓഫിസ് അനസ് എടത്തൊടിക ഉദ്ഘാടനം ചെയ്തു.
തിമിര്‍ത്തു പെയ്ത മഴയിലും ആവേശം ചോരാതെ ഓമശ്ശേരിയിലെ ഫുട്‌ബോള്‍ പ്രേമികള്‍ ഇന്ത്യന്‍ ഫുട്‌ബോള്‍ ടീമിന്റെ പ്രധിരോധ താരത്തെ സ്വീകരിച്ചു. ചടങ്ങ് കാരാട്ട് റസാഖ് എം.എല്‍.എ ഉദ്ഘാടനം ചെയ്തു. ക്ലബ് പ്രസിഡന്റ് ജംഷീര്‍ അധ്യക്ഷനായി. ഏതൊരു വ്യക്തിയുടെയും ഉയര്‍ച്ചയുടെ അടിസ്ഥാനം സ്വന്തം നാട്ടുകാരുടെ പിന്തുണയാണെന്ന് മറുപടി പ്രസംഗത്തില്‍ അനസ് അഭിപ്രായപ്പെട്ടു.
കാരാട്ട് റസാഖ് എം.എല്‍.എ ഉപഹാരം നല്‍കി. ഓമശ്ശേരി പ്രീമിയര്‍ ലീഗില്‍ പങ്കെടുത്ത ടീമുകള്‍ക്കും ജവാദ്, മുസമ്മില്‍, ഖലീല്‍ എന്നിവര്‍ക്കുമുള്ള ഉപഹാരം അനസ് സമ്മാനിച്ചു.
ഒ.പി.എല്‍ 2018-ന്റെ ലോഗോ പ്രകാശനം മുസ്തഫക്ക് നല്‍കി അനസ് എടത്തൊടിക നിര്‍വഹിച്ചു. കുഞ്ഞോയി പുത്തൂര്‍, പി.വി അബ്ദുറഹ്മാന്‍, ഇ.ജെ മനു, പി.സി വേലായുധന്‍ മാസ്റ്റര്‍, സുരേന്ദ്രന്‍ മാസ്റ്റര്‍, ഹുസൈന്‍ മാസ്റ്റര്‍, എ.കെ അബ്ദുല്ല, നാരായണന്‍ സംസാരിച്ചു. അബ്ദുല്‍ സലാം സ്വാഗതവും ഉബൈദ് നന്ദിയും പറഞ്ഞു.