പട്‌ന: ലോക്‌സഭാ തെരഞ്ഞെടുപ്പുമായി ബന്ധപ്പെട്ട സീറ്റ് വിഭജന ചര്‍ച്ചയിലുണ്ടായ അതൃപ്തിയെ തുടര്‍ന്ന് എന്‍.ഡി.എയുമായി ഇടഞ്ഞ മുന്‍കേന്ദ്ര മന്ത്രി ഉപേന്ദ്ര കുശ്്‌വാഹയുടെ പാര്‍ട്ടിയായ ആര്‍.എല്‍.എസ്.പി കോണ്‍ഗ്രസ് നേതൃത്വത്തിലുള്ള യു.പി.എയുടെ ഭാഗമായി. ഇന്നലെ കോണ്‍ഗ്രസ് നേതൃത്വവുമായി ചര്‍ച്ച നടത്തിയ ശേഷമാണ് അദ്ദേഹം മുന്നണിയില്‍ അംഗമായത്.
തങ്ങളുടെ മുന്‍പില്‍ ഒരുപാടു മാര്‍ഗങ്ങളുണ്ടായിരുന്നു. അതിലൊന്നായിരുന്നു യു.പി.എയുടെ ഭാഗമാകുക എന്നത്. അത് ഇപ്പോള്‍ പൂര്‍ത്തീകരിക്കപ്പെട്ടുവെന്ന് ഉപേന്ദ്ര കുശ്‌വാഹ പറഞ്ഞു. യു.പി.എയില്‍ ചേരാന്‍ തനിക്ക് കൂടുതല്‍ പ്രോത്സാഹനം നല്‍കിയത് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും ആര്‍.ജെ.ഡി അധ്യക്ഷന്‍ ലാലുപ്രസാദ് യാദവുമാണെന്നും അദ്ദേഹം വ്യക്തമാക്കി.
തന്റെ പാര്‍ട്ടി യു.പി.എയുടെ ഭാഗമായെന്ന് വ്യക്തമാക്കി കോണ്‍ഗ്രസ് ആസ്ഥാനത്ത് വിളിച്ചു ചേര്‍ത്ത വാര്‍ത്താ സമ്മേളനത്തില്‍ കുശ്‌വാഹക്കൊപ്പം കോണ്‍ഗ്രസ് നേതാക്കളായ അഹമ്മദ് പട്ടേല്‍, ശക്തി സിങ് കോഹില്‍, ആര്‍.ജെ.ഡി നേതാവ് തേജസ്വി യാദവ്, ശരത് യാദവ് തുടങ്ങിയവരും സംബന്ധിച്ചു. ബിഹാറില്‍ എന്‍.ഡി.എക്കെതിരേ രൂപം കൊടുത്ത മഹാസഖ്യത്തിലേക്ക് ഉപേന്ദ്ര കുശ്‌വാഹയുടെ പാര്‍ട്ടിയായ രാഷ്ട്രീയ ലോക് സമതാ പാര്‍ട്ടി (ആര്‍.എല്‍.എസ്.പി)യെ സ്വാഗതം ചെയ്യുന്നതായി കോണ്‍ഗ്രസ് നേതാവ് അഹമ്മദ് പട്ടേലും ആര്‍.ജെ.ഡി നേതാവ് തേജസ്വി യാദവും പറഞ്ഞു.
രാംവിലാസ് പസ്വാന്റെ പാര്‍ട്ടിയായ ലോക് ജനശക്തി പാര്‍ട്ടി (എല്‍.ജെ.പി)യും എന്‍.ഡി.എ മുന്നണിയില്‍ അസ്വസ്ഥരാണ്. അവരും താമസിയാതെ എന്‍.ഡി.എ വിട്ടേക്കുമെന്നും തേജസ്വി യാദവ് പറഞ്ഞു.