ന്യൂഡല്‍ഹി: ബാബരി മസ്ജിദ് ഭൂമിയുടെ ഉടമസ്ഥാവകാശം സംബന്ധിച്ച് ശീഈ ബോര്‍ഡ് സുപ്രിം കോടതിയില്‍ സമര്‍പ്പിച്ച സത്യവാങ്മൂലം രാഷ്ട്രീയ ലക്ഷ്യം വച്ചുള്ളതാണെന്ന് സുന്നി വഖ്ഫ് ബോര്‍ഡ്. ഉത്തര്‍പ്രദേശിലെ ശീഈ വഖ്ഫ് ബോര്‍ഡ് അത് തങ്ങളുടെ സ്ഥലമാണെന്നും അവിടെ രാമക്ഷേത്രം നിര്‍മിക്കാന്‍ അനുവദിക്കാമെന്നും സുപ്രിം കോടതിയില്‍ സത്യവാങ്മൂലം സമര്‍പ്പിച്ചിരുന്നു.
ഇതിനെതിരേയാണ് സുന്നി വഖ്ഫ് ബോര്‍ഡ് രംഗത്തെത്തിയത്. അലഹബാദ് കോടതിക്കുമുന്‍പാകെ ഇത്തരത്തിലൊരു നിലപാട് സ്വീകരിക്കാന്‍ തയാറാകാതെ സുപ്രിം കോടതിയില്‍ സമര്‍പ്പിച്ച സത്യവാങ്മൂലം അസ്വീകാര്യമാണെന്ന് സുന്നി വഖ്ഫ് ബോര്‍ഡ് അംഗം സഫര്‍യാബ് ജീലാനി പറഞ്ഞു.
തെളിവുകളടക്കമുള്ള കാര്യങ്ങള്‍ ഉയര്‍ത്തി അലഹബാദ് ഹൈക്കോടതിയില്‍ വാദം കേട്ടപ്പോള്‍പോലും ശീഈ ബോര്‍ഡ് ഇത്തരത്തിലൊരു നിലപാട് സ്വീകരിച്ചിരുന്നില്ല.
അതുകൊണ്ടുതന്നെ സുപ്രിം കോടതിയില്‍ സമര്‍പ്പിച്ച സത്യവാങ്മൂലത്തിന് നിയമസാധുതയില്ലെന്നും ജീലാനി വ്യക്തമാക്കി. സത്യവാങ്മൂലം അസ്വീകാര്യമാണെന്ന് ചൂണ്ടിക്കാട്ടി സുന്നി വഖ്ഫ് ബോര്‍ഡ് സ്വീകരിച്ച നിലപാടിനെ ശീഈ വിഭാഗത്തിലെ ജനങ്ങള്‍ പോലും പിന്തുണക്കുമെന്നും അദ്ദേഹം പറഞ്ഞു.
ബാബരി മസ്ജിദ് നിലനിന്ന സ്ഥലം ശീഈകള്‍ക്കോ സുന്നികള്‍ക്കോ അവകാശപ്പെട്ടതല്ല. മറിച്ച് അത് ആരാധനാലയത്തിന് മാത്രം അവകാശപ്പെട്ടതാണ്- ജീലാനി പറഞ്ഞു.