വാളാട്: അധ്യാപകരും വിദ്യാര്‍ഥികളും ഒരുമിച്ച് പ്രവൃത്തിക്കുകയാണ് എടത്തന ഗവ. ട്രൈബല്‍ ഹയര്‍ സെക്കന്‍ഡറി സ്‌കൂളിലെ ക്ലാസ് മുറികള്‍ ഹൈട്ടെക്കാക്കാന്‍.
സ്‌കൂളിലെ ഏഴ് ക്ലാസ് മുറികളാണ് ഹൈട്ടെക്കാക്കി ഉയര്‍ത്തുന്നത്. ഇതിന് മുന്നോടിയായി ശനിയാഴ്ച്ച അധ്യാപകരും വിദ്യാര്‍ഥികളും ചേര്‍ന്ന് ക്ലാസ് മുറികള്‍ പെയിന്റ് അടിച്ച് വൃത്തിയാക്കി.
ക്ലാസ് മുറികള്‍ ഹൈട്ടക്കാനുള്ള മുഴുവന്‍ തുകയും അധ്യാപകരും പി.ടി.എയും ചേര്‍ന്നാണ് സ്വരൂപിക്കുന്നതും. പട്ടികവര്‍ഗ വിഭാഗത്തില്‍പ്പെട്ട വിദ്യാര്‍ഥികളാണ് സ്‌കൂളില്‍ പഠിക്കുന്നവരില്‍ അധികവും.
സ്‌കൂള്‍ ഹൈട്ടെക്കാക്കി മാറ്റാനുള്ള പ്രവര്‍ത്തനങ്ങള്‍ പി.ടി.എ യുടെ നേതൃത്വത്തില്‍ നടന്നുവരികയാണ്. പ്രധാന അധ്യാപകന്‍ മോഹനന്‍, അധ്യാപകരായ ഷിജു, ഫ്രാന്‍സിസ്, അശോകന്‍, മിഥുന്‍, രമിത്ത് എന്നിവരുടെ നേതൃത്വത്തിലാണ് ക്ലാസ്മുറികള്‍ വൃത്തിയാക്കിയത്. തവിഞ്ഞാല്‍ പഞ്ചായത്തിലെ ഏറ്റവും പിന്നോക്കം നില്‍ക്കുന്ന ആദിവാസി സമൂഹത്തിലെ വിദ്യാര്‍ഥികളാണ് ഇവിടെ പഠനം നടത്തുന്നതില്‍ ഭൂരിഭാഗവും. ക്ലാസ് മൂറികള്‍ ഹൈട്ടെക്ക് ആവുന്നതോടെ വിദ്യാര്‍ഥികളുടെ പഠനിലവാരം ഉയര്‍ത്താന്‍ കഴിയുമെന്നാണ് അധ്യാപകരൂടെയും പി.ടി.എയുടെയും പ്രതീക്ഷ. ജില്ലാ പഞ്ചായത്തിന് കീഴിലാണ് എടത്തന ഗവ. ട്രൈബല്‍ ഹയര്‍ സെക്കന്‍ഡറി സ്‌കൂള്‍.