ഡല്‍ഹി കാപ്പിറ്റല്‍സിന്റെ ഇംഗ്ലീഷ് സൂപ്പര്‍ താരം ഹാരി ബ്രൂക്ക് ഇന്ത്യന്‍ പ്രീമിയര്‍ ലീഗില്‍ നിന്നും പിന്മാറി. ഈകഴിഞ്ഞ ലേലത്തില്‍ ഡല്‍ഹി 4 കോടി രൂപയ്ക്കാണ് ഇംഗ്ലണ്ട് ബാറ്ററെ ടീമില്‍ എത്തിച്ചത്. ഐ.പി.എല്‍ തുടങ്ങാന്‍ ഒരാഴ്ച മാത്രം ബാക്കിനില്‍ക്കെ ബ്രൂക്കിന്റെ തീരുമാനം ഡല്‍ഹിയെ ഞെട്ടിച്ചിരിക്കുകയാണ്. അടുത്തിടെ ഇംഗ്ലണ്ട് ടീമില്‍ നിന്നും അദ്ദേഹം വിട്ടുനിന്നിരുന്നു. ഇന്ത്യയ്‌ക്കെതിരെയുള്ള ടെസ്റ്റ് പരമ്പരയില്‍ ആദ്യഘട്ടം ടീമിനൊപ്പം ചേര്‍ന്നിരുന്നെങ്കിലും അവസാന നിമിഷം അദ്ദേഹം പിന്‍മാറി. 'ബ്രൂക്ക് ഈ സമയം കുടുംബത്തോടൊപ്പം നില്‍ക്കാന്‍ ആഗ്രഹിക്കുന്നു. അദ്ദേഹത്തിന്റെ സ്വകാര്യത ഞങ്ങള്‍ മാനിക്കുന്നു.' ഇംഗ്ലണ്ട് ക്രിക്കറ്റ് ബോര്‍ഡ് ജനുവരിയില്‍ പുറത്തുവിട്ട പത്രക്കുറിപ്പില്‍ അറിയിച്ചു.

ഇംഗ്ലീഷ് താരങ്ങള്‍ വ്യക്തിപരമായ കാരണങ്ങളാല്‍ കരാറില്‍ നിന്ന് പിന്മാറുന്ന പ്രവണത ഐപിഎല്‍ ഫ്രാഞ്ചൈസികള്‍ക്കിടയില്‍ എതിര്‍പ്പിന് കാരണമായിട്ടുണ്ട്. പെട്ടന്നുള്ള ഇത്തരം പിന്‍വാങ്ങലുകള്‍ ടീമിന്റെ സന്തുലിതാവസ്ഥയെ ബാധിക്കുമെന്നാണ് ടീമുകള്‍ ബി.സി.സി.ഐ യെ അറിയിച്ചത്. 'കളിക്കാര്‍ ലേലത്തില്‍ രജിസ്റ്റര്‍ ചെയ്തുകഴിഞ്ഞാല്‍, അവര്‍ അവരുടെ പ്രതിബദ്ധതയെ മാനിക്കണം. അത് നിഷേധിക്കുന്നത് പ്രൊഫഷണലിസമല്ല, ബിസിസിഐ ഇതില്‍ നടപടിയെടുക്കണം,' ടീമുടമകള്‍ പറയുന്നു.

മാര്‍ച്ച് 22 ന് മുന്‍പായി പകരക്കാരനെ തേടാനുള്ള തിരക്കിലാണ് ഡല്‍ഹി. 2023 സീസണില്‍ ബ്രൂക്കിനെ 13.25 കോടി രൂപയ്ക്ക് സണ്‍റൈസേഴ്‌സ് ഹൈദരാബാദ് വാങ്ങിയെങ്കിലും, 21 എന്ന താഴ്ന്ന ശരാശരിയില്‍ 190 റണ്‍സ് മാത്രമാണ് അദ്ദേഹത്തിന് നേടാനായത്. തല്‍ഫലമായി, ലേലത്തിന് മുമ്പ് ഫ്രാഞ്ചൈസി അദ്ദേഹത്തെ വിട്ടയച്ചു, അതിനു ശേഷം ഡല്‍ഹി കാപിറ്റല്‍സ് അദ്ദേഹത്തെ 4 കോടി രൂപയ്ക്കാണ് സ്വന്തമാക്കിയത്.