കായംകുളം: ലോറിയില്‍ കൊണ്ടുപോയ പാചകവാതക സിലിണ്ടര്‍ ചോര്‍ന്നത് പരിഭ്രാന്തി പരത്തി.അഗ്‌നിശമന സേനയുടെ സമയോചിതമായ ഇടപെടല്‍ മൂലം വന്‍ ദുരന്തം ഒഴിവായി.
ഇന്നലെ വൈകിട്ട് അഞ്ച് മണിയോടെ ദേശീയപാതയില്‍ മുക്കട ജംഗ്ഷനു സമീപമായിരുന്നു സംഭവം.കൊച്ചി ഇരുമ്പനത്ത് നിന്നും വര്‍ക്കലയിലേക്ക് കൊണ്ടുപോകുകയായിരുന്ന ഗാര്‍ഹിക ഉപയോഗത്തിനുള്ള പാചകവാതക സിലിണ്ടറില്‍ നിന്നാണ് വാതക ചോര്‍ച്ച ഉണ്ടായത്. സിലിണ്ടറുകളുമായി വന്ന ലോറി മുക്കട ജംഗ്ഷനു സമീപം ഡ്രൈവര്‍ ചായ കുടിക്കാനായി നിര്‍ത്തി.
പരിസരം ആകെ വാതകം ചോരുന്ന ഗന്ധം വ്യാപിച്ചതിനൈ തുടര്‍ന്ന് കായംകുളം അഗനിശമന സേനയെ വിവരമറിയിച്ചു.ഉടന്‍തന്നെ സ്റ്റേഷന്‍ ഓഫീസര്‍ വി.എം ഷാജഹാന്റെ നേതൃത്വത്തില്‍ അഗ്‌നിശമന സേന എത്തി.
തിരച്ചില്‍ നടത്തി ചോര്‍ച്ചയുള്ള സിലിണ്ടര്‍ കണ്ടുപിടിച്ചു പുറത്തെടുത്ത് സമീപമുള്ള തോട്ടില്‍ വെള്ളത്തില്‍ മുക്കിവച്ച് സിലിണ്ടറില്‍ നിന്നും വാതകം പൂര്‍ണ്ണമായി നിര്‍വീര്യമാക്കി.സിലിണ്ടറിന്റെ ചുവട് ദ്രവിച്ചിരുന്നതാണ് ചോര്‍ച്ചക്ക് കാരണമായത്.