കുണ്ടുംകുഴിയും നിറഞ്ഞ റോഡില്‍കൂടി ദിവസേന 16 കിലോമീറ്ററോളം സഞ്ചരിച്ചാണ് ഇവര്‍ സ്‌കൂളിലെത്തുന്നത്
ആലക്കോട്: ഗോത്രസാരഥി പദ്ധതി കടലാസിലൊതുങ്ങിയതോടെ മണക്കടവ് അപ്പര്‍ ചീക്കാട് ആദിവാസി കോളനിയിലെ കുട്ടികള്‍ ദുരിതത്തിലായി. കുണ്ടുംകുഴിയും നിറഞ്ഞ റോഡില്‍കൂടി ദിവസേന 16 കിലോമീറ്ററോളം സഞ്ചരിച്ചാണ് ഇവര്‍ സ്‌കൂളിലെത്തുന്നത്.
ആദിവാസി പുനരധിവാസ മേഖലകളില്‍ നിന്ന് കുട്ടികളെ വിദ്യാലയങ്ങളിലേക്ക് എത്തിക്കുന്നതിനായാണ് ഗോത്രസാരഥി പദ്ധതി ആരംഭിച്ചത്. പദ്ധതി കാര്യക്ഷമമായി പ്രവര്‍ത്തിക്കാത്തതാണ് ദുരിതത്തിന് കാരണം. ജില്ലയിലെ പല ആദിവാസി ഊരുകളിലെ അവസ്ഥയും വ്യത്യസ്തമല്ല.
മഴക്കാലമായതോടെ നിറഞ്ഞൊഴുകുന്ന തോടുകള്‍ മുറിച്ചുകടക്കണമെങ്കില്‍ മുതിര്‍ന്നവരുടെ സഹായമില്ലാതെ പറ്റില്ല. ഇഴജന്തുക്കളുടെയും അട്ടകളുടെയും ശല്യം കാരണം വടിയും ഉപ്പു കിഴിയുമായാണ് ഇവരുടെ യാത്ര. കുത്തനെയുള്ള കയറ്റവും കുത്തൊഴുക്കുള്ള പുഴയും കടന്ന് ദുര്‍ഘടമായ പാതയിലൂടെ സഞ്ചരിച്ച് സ്‌കൂളുകളില്‍ എത്തുന്ന ഇവര്‍ക്ക് പലതരത്തിലുള്ള ശാരീരികാസ്വാസ്ഥ്യങ്ങളും ഉണ്ടാകുന്നുണ്ട്.
നിരന്തരമായ ഇടപെടലുകളുടെ ഫലമായി രണ്ടു വര്‍ഷം മുമ്പുവരെ കുട്ടികളെ സ്‌കൂളില്‍ എത്തിക്കാന്‍ കോളനിയില്‍ വാഹനം എത്തിയിരുന്നു. എന്നാല്‍ പുതിയ അധ്യയന വര്‍ഷം ആരംഭിച്ച് നാളിതുവരെയായിട്ടും അധികൃതര്‍ നടപടി സ്വീകരിച്ചിട്ടില്ല.
ഇത്രയും ദൂരം നടക്കാന്‍ സാധിക്കാത്തതിനാല്‍ പലരും സ്‌കൂളുകളില്‍ പോകുന്നത് വല്ലപ്പോഴുമാണ്. കുട്ടികളുടെ അവകാശങ്ങള്‍ക്ക് വേണ്ടി നിലകൊള്ളുന്നു എന്നവകാശപ്പെടുന്നവര്‍പോലും ഇതൊന്നും കണ്ട മട്ടില്ല. ബാലാവകാശ നിയമങ്ങള്‍ കാറ്റില്‍ പറത്തിയുള്ള അധികൃതരുടെ നടിപടിക്കെതിരേ പ്രതിഷേധം ശക്തമാണ്.