കാസര്‍കോട്: സിനാന്‍ വധക്കേസില്‍ പ്രതികളെ ശിക്ഷിക്കുന്നതിനു സര്‍ക്കാര്‍ മേല്‍ കോടതിയില്‍ അപ്പീല്‍ നല്‍കണമെന്ന് എസ്.ടി.യു ദേശീയ സെക്രട്ടറി എ. അബ്ദുല്‍ റഹ്മാന്‍ അബ്ദുല്‍ റഹ്മാന്‍ ആവശ്യപ്പെട്ടു.
സിനാന്‍ വധക്കേസിലെ പ്രതികളെ കാസര്‍കോട് ജില്ലാ സെഷന്‍സ് കോടതി വെറുതെ വിട്ട സാഹചര്യത്തില്‍ സര്‍ക്കാര്‍ മേല്‍ കോടതിയില്‍ അപ്പീല്‍ സമര്‍പ്പിക്കണമെന്ന് മുസ്‌ലിം യൂത്ത് ലീഗ് ജില്ലാ പ്രസിഡന്റ് അഷ്‌റഫ് ഇടനീരും ജനറല്‍ സെക്രട്ടറി ടി.ഡി കബീറും ആവശ്യപ്പെട്ടു.
2008 ഏപ്രില്‍ 16നു കാസര്‍കോട് ആന ബാഗിലുവില്‍ വച്ച് ബൈക്ക് തടഞ്ഞു നിര്‍ത്തിയാണു സംഘ്പരിവാര്‍ ക്രിമിനല്‍ സംഘം നെല്ലിക്കുന്ന് ബങ്കരക്കുന്നിലെ സിനാനെ വെട്ടിക്കൊലപ്പെടുത്തിയതെന്നും എഫ്.ഐ.ആര്‍ രജിസ്റ്റര്‍ ചെയ്യുന്നത് മുതല്‍ കുറ്റപത്രം സമര്‍പ്പിക്കുന്നത് വരെയുള്ള നടപടികളില്‍ പൊലിസിന്റെ ഭാഗത്ത് നിന്നുണ്ടാകുന്ന വീഴ്ചകള്‍ കാരണമാണ് ഇത്തരം കേസുകളില്‍ പ്രതികള്‍ ശിക്ഷിക്കപ്പെടാതെ പോകുന്നതെന്നും ഇവര്‍ ആരോപിച്ചു. നീതിന്യായ വ്യവസ്ഥയുടെ ഏതറ്റംവരെയും പോയി സിനാന്‍ വധക്കേസിലെ പ്രതികള്‍ക്കു ശിക്ഷ ഉറപ്പാക്കാന്‍ സര്‍ക്കാര്‍ തയാറാവണമെന്നും യൂത്ത് ലീഗ് നേതാക്കള്‍ ആവശ്യപ്പെട്ടു.