ബാഴ്‌സലോണ: വിവിധ തലങ്ങളില്‍നിന്നുള്ള അന്താരാഷ്ട്ര സമ്മര്‍ദങ്ങള്‍ക്കിടെ കാറ്റലോണിയ പ്രാദേശിക ഭരണകൂടം സ്വാതന്ത്ര്യപ്രഖ്യാപനത്തിനുള്ള ഔദ്യോഗിക ചര്‍ച്ചകള്‍ തുടങ്ങി.
വൈകി ലഭിക്കുന്ന വിവരങ്ങള്‍ പ്രകാരം നേരത്തെ അറിയിച്ചതിലും ഒരു മണിക്കൂര്‍ വൈകിയാണ് പ്രത്യേക പാര്‍ലമെന്റ് സമ്മേളനം നടക്കുന്നത്. ഇന്ത്യന്‍ സമയം വൈകിട്ട് ഒന്‍പതരയ്ക്ക് കാറ്റലോണിയ പ്രസിഡന്റ് കാള്‍സ് പ്യൂഗ്‌ഡെമോന്റ് സ്വാതന്ത്ര്യം പ്രഖ്യാപിച്ചുകൊണ്ടുള്ള പ്രസംഗം ആരംഭിക്കുമെന്നാണു നേരത്തെ അറിയിച്ചിരുന്നത്. എന്നാല്‍, ഈ സമയത്തു മന്ത്രിമാരുടെ പ്രത്യേക യോഗം പ്രസിഡന്റിന്റെ നേതൃത്വത്തില്‍ നടന്നു.
ജനഹിത പരിശോധനയ്ക്കുശേഷം ഇതാദ്യമായാണ് പ്രാദേശിക പാര്‍ലമെന്റ് ചേരുന്നതും പ്യൂഗ്‌ഡെമോന്റ് ജനപ്രതിനിധികളെ അഭിമുഖീകരിക്കുന്നതും. പല ഭാഗങ്ങളില്‍നിന്നുള്ള സമ്മര്‍ദങ്ങള്‍ക്കിടയിലും സ്വതന്ത്രരാജ്യം എന്ന മുന്‍തീരുമാനത്തില്‍ ഉറച്ചുതന്നെയാണ് പ്യൂഗ്‌ഡെമോന്റിന്റെ നേതൃത്വത്തിലുള്ള പ്രാദേശിക ഭരണകൂടം. സമ്മേളനത്തിന്റെ മുന്നോടിയായി പാര്‍ലമെന്റ് മന്ദിരത്തിനു പരിസരത്തെല്ലാം കാറ്റലോണിയ പൊലിസ് വന്‍ സുരക്ഷാസന്നാഹങ്ങള്‍ ഒരുക്കിയിരുന്നു. സ്വാതന്ത്ര്യ പ്രഖ്യാപനമുണ്ടായാല്‍ പട്ടാള അട്ടിമറി അടക്കമുള്ള നീക്കങ്ങള്‍ പ്രതീക്ഷിക്കുന്നുണ്ട്. ബാഴ്‌സലോണയുടെ വിവിധ ഭാഗങ്ങളിലും മറ്റു നഗരങ്ങളിലും പതിനായിരക്കണക്കിനു സ്വാതന്ത്ര്യവാദികളും വിരുദ്ധരും തടിച്ചുകൂടിയിരുന്നു.
എന്നാല്‍, പ്രാദേശിക ഭരണകൂടം സ്വാതന്ത്ര്യ പ്രഖ്യാപനം നടത്തിയാല്‍ ദേശീയ ഭരണഘടന മുന്നോട്ടുവയ്ക്കുന്ന അധികാരം ഉപയോഗിക്കുമെന്ന് സ്പാനിഷ് പ്രധാനമന്ത്രി മരിയാനോ രാജോയ് മുന്നറിയിപ്പ് നല്‍കിയിട്ടുണ്ട്.
രാജ്യത്തെ സ്വയംഭരണാധികാരമുള്ള പ്രദേശങ്ങള്‍ ഭരണഘടന അനുശാസിക്കുന്ന നിയമങ്ങളും ഉത്തരവാദിത്തങ്ങളും അനുസരിക്കാനും നിര്‍വഹിക്കാനും തയാറാകാതിരിക്കുകയോ സ്‌പെയിനിന്റെ പൊതുതാല്‍പര്യത്തിനു ഹാനികരമായ തരത്തില്‍ പ്രവര്‍ത്തിക്കുകയോ ചെയ്താല്‍ പ്രദേശത്തിന്റെ സ്വയംഭരണാധികാരം എടുത്തുകളയാന്‍ സ്പാനിഷ് ഭരണഘടനയുടെ 155-ാം വകുപ്പ് ദേശീയ സര്‍ക്കാരിന് അധികാരം നല്‍കുന്നുണ്ട്.
സ്പാനിഷ് ഭരണഘടനാ കോടതിയുടെ വിലക്കും ദേശീയ സര്‍ക്കാരിന്റെ അടിച്ചമര്‍ത്തലും മറികടന്ന് ഒക്ടോബര്‍ ഒന്നിനു നടന്ന കാറ്റലോണിയ ജനഹിത പരിശോധനയില്‍ 43 ശതമാനം പേരാണ് വോട്ട് രേഖപ്പെടുത്തിയത്.
ഇതില്‍ 90 ശതമാനം പേരും സ്വതന്ത്രരാജ്യത്തെ പിന്തുണച്ചതായി പ്രാദേശിക ഭരണകൂടം അവകാശപ്പെട്ടിരുന്നു.