കല്‍പ്പറ്റ. ദേശീയ രാഷ്ട്രീയത്തില്‍ 2019 നേക്കാള്‍ ശ്രദ്ധനേടുന്ന തെരഞ്ഞെടുപ്പാണ് ഇത്തവണ വയനാട് പാര്‍ലമെന്റ് മണ്ഡലത്തില്‍. ദേശീയ രാഷ്ട്രീയത്തിലെ രണ്ട് പ്രധാന നേതാക്കളാണ് ഇത്തവണ വയനാട്ടില്‍ ഇറങ്ങുന്നത്. യു.ഡി.എഫിന് കരുത്തുള്ള മണ്ഡലത്തില്‍ സ്ഥാനാര്‍ഥി രാഹുല്‍ ഗാന്ധിക്ക് കാര്യങ്ങള്‍ എളുപ്പമാകുമെന്നാണ് പാര്‍ട്ടി ക്യാംപിലെ പ്രതീക്ഷ. എല്‍.ഡി.എഫിനായി ദേശീയ രാഷ്ട്രീയത്തില്‍ ഫാഷിസ്റ്റ് വിരുദ്ധ പോരാട്ടങ്ങളുടെ മുന്നണിപ്പോരാളികളില്‍ ഒരാളും സി.പി.ഐ ദേശീയ സമിതിയംഗവുമായ ആനി രാജയാണ് കളത്തിലിറങ്ങുന്നത്.

മണ്ഡലത്തില്‍ പ്രബലരല്ലാത്തതിനാല്‍ ഇവിടുത്തെ മത്സരം ഉത്തരേന്ത്യയില്‍ പ്രചാരണായുധമാക്കാനാണ് എന്‍.ഡി.എ ശ്രമം. നിലവില്‍ എന്‍.ഡി.എ മണ്ഡലത്തില്‍ സ്ഥാനാര്‍ഥിയെ പ്രഖ്യാപിച്ചിട്ടില്ല.

മികച്ച ഭൂരിപക്ഷത്തിനാണ് രാഹുലിനെ കഴിഞ്ഞ തവണ മണ്ഡലം ലോക്‌സഭയിലേക്ക് അയച്ചത്. അത് ഇത്തവണ വര്‍ധിക്കുമെന്നാണ് യു.ഡി.എഫ് നേതാക്കളുടെ അവകാശവാദം. ശക്തമായ മത്സരത്തിനൊരുങ്ങിയാണ് എല്‍.ഡി.എഫ് നേരത്തെ തന്നെ കളം പിടിച്ചത്. മികച്ച സ്ഥാനാര്‍ഥിയെ തന്നെ കളത്തിലിറക്കിയതിനാല്‍ രാഹുലിനെ അനായാസം വിജയിച്ച് കയറാന്‍ അനുവദിക്കില്ലെന്നാണ് എല്‍.ഡി.എഫ് പ്രഖ്യാപനം .
കഴിഞ്ഞ നിയമസഭാ തെരഞ്ഞെടുപ്പില്‍ കല്‍പ്പറ്റ, സുല്‍ത്താന്‍ ബത്തേരി, ഏറനാട്, വണ്ടൂര്‍ നിയോജക മണ്ഡലങ്ങള്‍ യു.ഡി.എഫിനൊപ്പമാണ് നിന്നത്്. മാനന്തവാടി, തിരുവമ്പാടി, നിലമ്പൂര്‍ നിയോജകമണ്ഡലങ്ങള്‍ എല്‍.ഡി.എഫും നേടി.
2019ലെ തെരഞ്ഞെടുപ്പില്‍ രാഹുല്‍ഗാന്ധി 4,31,770 വോട്ടിന്റെ ഭൂരിപക്ഷത്തിനാണ് വിജയിച്ചത്. സി.പി.ഐയിലെ പി.പി. സുനീറായിരുന്നു തൊട്ടടുത്ത എതിരാളി. എന്‍.ഡി.എക്കുവേണ്ടി ബി.ഡി.ജെ.എസ് നേതാവ് തുഷാര്‍ വെള്ളാപ്പള്ളിയാണ് മത്സരിച്ചത്.