മത്സരം കാണാനെത്തിയ യുവാവിനെ മര്ദ്ദിച്ചെന്ന്; ഐവറി കോസ്റ്റ് താരം ഹസന് ജൂനിയറിനെതിരെയും കേസ്
മലപ്പുറം: മലപ്പുറം അരീക്കോട് ഫുട്ബാള് മത്സരത്തിനിടെയുണ്ടായ സംഘര്ഷത്തില് ഐവറി കോസ്റ്റ് താരം ഹസന് ജൂനിയറിനെതിരെയും കേസ്. അരീക്കോട് സ്വദേശിയുടെ പരാതിയിലാണ് പൊലിസ് കേസെടുത്തത്. കളി കാണാന് എത്തിയപ്പോള് മര്ദിച്ചെന്നാണ് പരാതി . ഭീഷണിപ്പെടുത്തല്,മര്ദിക്കല്,അസഭ്യം പറയല്,തുടങ്ങിയ വകുപ്പുകളാണ് ചുമത്തിയത്.
തനിക്കു നേരെ ആക്രമണം ഉണ്ടായെന്ന് കാണിച്ച് ഹസന് ജൂനിയര് മലപ്പുറം ജില്ലാ പൊലിസ് മേധാവിക്ക് പരാതി നല്കിയിരുന്നു. കഴിഞ്ഞ ഞായാറാഴ്ചയാണ് കേസിനാസ്പദമായ സംഭവം. അരീക്കോട്ടില് പ്രാദേശിക കൂട്ടായ്മയായ ടൗണ് ടീം ചെമ്രകാട്ടൂര് സംഘടിപ്പിച്ച ഫൈവ്സ് ഫുട്ബോള് ടൂര്ണമെന്റിനിടെയാണ് സംഘര്ഷമുണ്ടായത്. ജവഹര് മാവൂരിന്റെ താരമായ ഹസന് ജൂനിയര് ന്യൂലാല പൂക്കൊളത്തൂര് എന്ന ടീമിന് വേണ്ടി കളിക്കാനെത്തിയതായിരുന്നു. മത്സരത്തിനിടെ കാണികളോട് താരം മോശമായി പെരുമാറിയെന്ന് ആരോപിച്ചായിരുന്നു മര്ദനം.
തനിക്കു നേരെ കാണികള് വംശീയാധിക്ഷേപം നടത്തി, തന്നെ കല്ലെറിഞ്ഞെന്നും ഇതില് നിന്ന് ഒഴിഞ്ഞുമാറുന്നതിനിടെ മര്ദിച്ചെന്നും ഹസന് ജൂനിയര് നല്കിയ പരാതിയില് പറയുന്നു. കളിക്കിടെ കോണ്റെടുക്കാന് പോയ തന്നെ കാണികള് കുരങ്ങനെന്ന് വിളിച്ചെന്നും ഒരാള് കല്ലെറിഞ്ഞെന്നുമാണ് ഹസന് ജൂനിയര് പരാതില് പറയുന്നത്. തിരിഞ്ഞുനിന്ന തന്റെ നേരെ ഇയാള് വീണ്ടും കല്ലെറിഞ്ഞു. വംശീയാധിക്ഷേപം തുടര്ന്ന് കല്ലെറിഞ്ഞതോടെ താന് അവിടെ നിന്ന് പോയി. ഇതിനിടെ എതിര് ടീമിന്റെ മാനേജ്മെന്റും കാണികളും തന്നെ അക്രമിച്ചെന്നും എസ്പിക്ക് നല്കിയ പരാതിയിലുണ്ട്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."