ഗോള്‍ഡ് കോസ്റ്റ്: കോമണ്‍വെല്‍ത്ത് ഷൂട്ടിങ് ചാംപ്യന്‍ഷിപ്പില്‍ ഇന്ത്യന്‍ താരങ്ങള്‍ക്ക് വീണ്ടും മെഡല്‍. 50 മീറ്റര്‍ റൈഫിള്‍ പ്രോണ്‍ വിഭാഗത്തില്‍ ഇന്ത്യയുടെ ഒളിംപിക്‌സ് വെങ്കല മെഡല്‍ ജേതാവ് ഗഗന്‍ നരംഗ് വെള്ളിയും ഇതേ ഇനത്തില്‍ ഇന്ത്യയുടെ തന്നെ സ്വപ്നില്‍ കൗശല്‍ വെങ്കലവും നേടി. വനിതകളുടെ 25 മീറ്റര്‍ പിസ്റ്റള്‍ വിഭാഗത്തില്‍ അന്നു രാജ് സിങും ഇന്ത്യക്കായി വെങ്കലം വെടിവച്ചിട്ടു.
കരിയറിലെ മോശം ഫോമിലൂടെ കടന്നുപോയ ഗഗന്‍ മികച്ച തിരിച്ചുവരവാണ് കോമണ്‍വെല്‍ത്ത് ചാംപ്യന്‍ഷിപ്പില്‍ നടത്തിയത്. ഈ സീസണില്‍ താരം നേടുന്ന ആദ്യ മെഡല്‍ കൂടിയാണിത്. ഫൈനലില്‍ 246.3 പോയിന്റുകള്‍ നേടിയാണ് ഗഗന്‍ വെള്ളി സ്വന്തമാക്കിയത്. സ്വപ്നില്‍ 225.6 പോയിന്റുകള്‍ ഷൂട്ട് ചെയ്താണ് വെങ്കലത്തില്‍ മുത്തമിട്ടത്. എട്ട് പേര്‍ മാറ്റുരച്ച ഫൈനലില്‍ ആസ്‌ത്രേലിയന്‍ താരം ഡാന്‍ സാംപ്‌സനാണ് സ്വര്‍ണം സ്വന്തമാക്കിയത്. 25 മീറ്റര്‍ പിസ്റ്റള്‍ വിഭാഗത്തില്‍ ഹീന സിദ്ദുവടക്കമുള്ള താരങ്ങള്‍ ഫൈനല്‍ യോഗ്യത നേടിയെങ്കിലും പരിചയ സമ്പന്നയായ അന്നു മാത്രമാണ് മികച്ച പ്രകടനം പുറത്തെടുത്തത്.