കൊണ്ടോട്ടി: കോളിളക്കം സൃഷ്ടിച്ച നടിയെ ആക്രമിച്ചതുള്‍പ്പടെ സംസ്ഥാനത്ത് പത്ത് മാസത്തിനിടെ സ്ത്രീകള്‍ ഇരകളായ 11,001 കേസുകള്‍. ഇതില്‍ 2452 എണ്ണവും ഭര്‍തൃപീഡന കേസുകളാണ്. 9 സ്ത്രീധന മരണങ്ങളും റിപ്പോര്‍ട്ട് ചെയ്തിട്ടുണ്ട്. സംസ്ഥാന ക്രൈ റെക്കോര്‍ഡ് ബ്യൂറോയുടെ കണക്കുകള്‍ പ്രകാരം സ്ത്രീകള്‍ക്കെതിരേ ഏറ്റവും കൂടുതല്‍ ആക്രമണം നടന്നത് എറണാകുളം ജില്ലയിലാണ്. വര്‍ഷങ്ങളായി കേസുകള്‍ കൂടുതല്‍ തിരുവനന്തപുരം ജില്ലയിലായിരുന്നു. എന്നാല്‍ ഇക്കഴിഞ്ഞ സെപ്റ്റംബര്‍ 30 വരെയുളള കാലയളവില്‍ കൊച്ചി സിറ്റിയിലും എറണാകുളം റൂറലിലുമായി മാത്രം 1572 കേസുകളാണ് സ്ത്രീകള്‍ക്കെതിരേയുണ്ടായത്. സ്ത്രീധന മരണം കൂടുതല്‍ മലപ്പുറത്തും ഭര്‍തൃ പീഡനങ്ങള്‍ ഏറെയും കോഴിക്കോട്, മലപ്പുറം ജില്ലകളിലുമാണ്.
സ്ത്രീധന മരണം, ബലാത്സംഗം, തട്ടിക്കൊണ്ടുപോകല്‍, പിടിച്ചുപറി, ഭര്‍തൃപീഡനം തുടങ്ങിയവയാണ് സ്ത്രീകള്‍ക്കെതിരേ കൂടുതല്‍ രജിസ്റ്റര്‍ ചെയ്തിട്ടുള്ളത്. കൊച്ചിക്ക് പിറകെയുള്ള തിരുവനന്തപുരത്ത് 1326 കേസുകളാണ് റിപ്പോര്‍ട്ട് ചെയ്തത്. കോഴിക്കോട്ട് 1111 കേസുകളും, മലപ്പുറത്ത് 1075 കേസുകളുമുണ്ടായി. 310 കേസുകള്‍ മാത്രം റിപ്പോര്‍ട്ട് ചെയ്ത വയനാട് ജില്ലയിലാണ് ഏറ്റവും കുറവുള്ളത്. മറ്റു ജില്ലകളുടെ കണക്ക് ഇങ്ങിനെ: കൊല്ലം 896, പത്തനംതിട്ട 653, ആലപ്പുഴ 625, കോട്ടയം 406, ഇടുക്കി 430, തൃശൂര്‍ 1044, പാലക്കാട് 486, കണ്ണൂര്‍ 509,കാസര്‍കോട് 453.
ഏറ്റവും കൂടുതല്‍ ബലാത്സംഗ കേസുകളുള്ളത് തിരുവനന്തപുരം ജില്ലയിലാണ്. തിരുവനന്തപുരം സിറ്റിയിലും റൂറലിലുമായി 216 കേസുകളാണ് രജിസ്റ്റര്‍ ചെയ്തത്. കൊല്ലം 163, എറണാകുളം 153, തൃശൂര്‍ 137, മലപ്പുറം 136 ബലാത്സംഗ കേസുകളും റിപ്പോര്‍ട്ട് ചെയ്തിട്ടുണ്ട്. 53 കേസുകള്‍ രജിസ്റ്റര്‍ ചെയ്ത കണ്ണൂരിലാണ് കുറവുള്ളത്. പത്തനംതിട്ട 61, ആലപ്പുഴ 60, കോട്ടയം 79, ഇടുക്കി 85, പാലക്കാട് 105, കോഴിക്കോട് 95,വയനാട് 71, കാസര്‍കോട് 61 ബലാത്സംഗ കേസുകളുമാണ് രജിസ്റ്റര്‍ ചെയ്തത്. രജിസ്റ്റര്‍ ചെയ്ത ഒന്‍പത് സ്ത്രീധന മരണക്കേസുകളില്‍ മൂന്നെണ്ണവും മലപ്പുറം ജില്ലയിലാണ്. കൊല്ലം, തിരുവനന്തപുരം എന്നിവടങ്ങളില്‍ രണ്ട് കേസുകളും,ആലപ്പുഴ, ഇടുക്കി ജില്ലകളില്‍ ഓരോ വനിതകളും മരിച്ചു.
ഭര്‍ത്താവിനാലും ഭര്‍തൃകുടംബാംഗങ്ങളാലും പീഡിപ്പിക്കപ്പെട്ടവര്‍ കൂടുതല്‍ മലപ്പുറം, കോഴിക്കോട് ജില്ലകളിലാണ്. ഇരു ജില്ലകളിലും 317 കേസുകളാണ് 10 മാസത്തിനിടെ ഉണ്ടായത്. തൃശൂരില്‍ 267 കേസുകളും, കൊല്ലത്ത് 238 കേസുകളുമുണ്ടായി. ഏറ്റവും കുറവ് കേസുകളുള്ള പത്തനം തിട്ടയില്‍ 77 കേസുകളും വയനാട്ടില്‍ 79 കേസുകളുമുണ്ടായി. കഴിഞ്ഞ വര്‍ഷം സംസ്ഥാനത്ത് 15,114 കേസുകളും തൊട്ടുമുന്‍പുള്ള വര്‍ഷം 12485 കേസുകളുമാണ് സ്ത്രീകള്‍ക്കെതിരേ ആകെ റിപ്പോര്‍ട്ട് ചെയ്തത്. പിടിച്ചു പറി,കൈയേറ്റം തുടങ്ങി സംസ്ഥാനത്തെ റെയില്‍ സ്‌റ്റേഷനുകളില്‍ സ്ത്രീകള്‍ക്കെതിരേ 128 കേസുകളാണ് റിപ്പോര്‍ട്ട് ചെയ്തത്.