തിരുവനന്തപുരം: ഓഖി ചുഴലിക്കാറ്റില്‍ പെട്ട് കടലില്‍ കുടുങ്ങിയ മത്സ്യത്തൊഴിലാളികളെ രക്ഷപ്പെടുത്താന്‍ സാധ്യമായതെല്ലാം ചെയ്യുമെന്ന് സംസ്ഥാന ഫിഷറീസ് മന്ത്രി ജെ മേഴ്‌സിക്കുട്ടിയമ്മ അറിയിച്ചു.

38 ബോട്ടുകള്‍ കോസ്റ്റ് ഗാര്‍ഡും നേവിയും കണ്ടെത്തിയിട്ടുണ്ട്. ഇവരുടെ ബോട്ടുകള്‍ കൂടി കരയ്‌ക്കെത്തിക്കണമെന്നാണ് തൊഴിലാളികള്‍ ആവശ്യപ്പെടുന്നത്. ഇത് ആത്മഹത്യാപരമാണ്. ബോട്ടുകള്‍ ഉപേക്ഷിച്ച് നേവിയുടെ കപ്പലില്‍ കയറണമെന്ന് അനുനയിപ്പിക്കുകയാണെന്നും മന്ത്രി പറഞ്ഞു.

10 തൊഴിലാളികളെ കൂടി കടലില്‍ നിന്ന് രക്ഷപ്പെടുത്തിയെടുത്തുവെന്നും മന്ത്രി പറഞ്ഞു. 70 തൊഴിലാളികളെ വയര്‍ലെസ് സിസ്റ്റം വഴി ബന്ധപ്പെട്ടിട്ടുണ്ട്. വിഴിഞ്ഞത്തുള്ള കുളച്ചല്‍ ബോട്ട് സര്‍ക്കാര്‍ ഏറ്റെടുത്ത് രക്ഷാപ്രവര്‍ത്തനത്തിനായി പുറപ്പെട്ടിട്ടുണ്ടെന്നും മന്ത്രി അറിയിച്ചു.

അതിനിടെ, രക്ഷാപ്രവര്‍ത്തന കാര്യങ്ങള്‍ ചര്‍ച്ച ചെയ്യാന്‍ മുഖ്യമന്ത്രി പിണറായി വിജയന്‍ അടിയന്തര യോഗം വിളിച്ചു ചേര്‍ത്തു.

മുന്‍ മുഖ്യമന്ത്രി ഉമ്മന്‍ചാണ്ടി പൂന്തുറ കടല്‍ത്തീരത്ത് സന്ദര്‍ശനം നടത്തി സ്ഥിതിഗതികള്‍ വിലയിരുത്തി. ദുരന്തത്തിന്റെ വ്യാപ്തി മുഖ്യമന്ത്രി നേരിട്ടു കണ്ട് ബോധ്യപ്പെടുത്തുമെന്ന് അദ്ദേഹം പ്രതികരിച്ചു.