റിലയൻസിന് നേട്ടം; അറ്റാദായം 9 ശതമാനം ഉയർന്ന് 17,265 കോടി രൂപയായി, ലാഭം വർധിപ്പിച്ച് ജിയോ

മുംബൈ: വിപണി മൂല്യത്തിന്റെ കാര്യത്തിൽ ഇന്ത്യയിലെ ഏറ്റവും വലിയ കമ്പനിയായ റിലയൻസ് ഇൻഡസ്ട്രീസ് (ആർഐഎൽ) ത്രൈമാസ ലാഭത്തിൽ 10% വർധന രേഖപ്പെടുത്തി. നടപ്പ് സാമ്പത്തിക വർഷത്തിന്റെ മൂന്നാം പാദത്തിൽ 17,265 കോടി രൂപ അറ്റാദായം ലഭിച്ചു. കഴിഞ്ഞ സാമ്പത്തിക വർഷം ഇതേ അവലോകന കാലയളവിലെ 15,792 കോടി രൂപയിൽനിന്ന് 9.3 ശതമാനം വർധനവാണിത്. പ്രവർത്തന വരുമാനം 2.2 ലക്ഷം കോടി രൂപയാണ്. നികുതിക്ക് ശേഷമുള്ള റിലയൻസിന്റെ ലാഭം 10.9% വർധിച്ച് 19,641 കോടി രൂപയായി.

എന്നാൽ, റിലയൻസിന്റെ പ്രധാന ഓയിൽ-ടു-കെമിക്കൽ (O2C) ബിസിനസ്സ് ഈ കാലയളവിൽ ദുർബലമാണ്. വരുമാനം ഏകദേശം 4% വർധിച്ച് 2.27 ലക്ഷം കോടി രൂപയായി. അടിസ്ഥാന ബിസിനസ് പ്രകടനത്തിന്റെ മാനദണ്ഡമായ പ്രവർത്തന ലാഭം ഏകദേശം 16 ശതമാനം വർധിച്ച് 42,371 കോടി രൂപയായി. ഡിസംബർ പാദത്തിൽ ജാംനഗർ കേന്ദ്രത്തിലെ ചില യൂണിറ്റുകൾ അറ്റകുറ്റപ്പണികൾക്കായി രണ്ട് മാസത്തോളം അടച്ചിട്ടതാണ് വരുമാനത്തെ ബാധിച്ചത്. യൂണിറ്റുകൾ സാധാരണയായി ഏഴ്-എട്ട് വർഷത്തിലൊരിക്കൽ അറ്റകുറ്റപ്പണികൾക്കായി അടച്ചിടാറുണ്ട്. ഡിസംബർ പാദത്തിൽ എല്ലാ യൂണിറ്റുകളും ലഭ്യമായിരുന്നെങ്കിൽ, O2C യുടെ പ്രവർത്തന ലാഭം കൂടുതലാകുമായിരുന്നു.

ശക്തമായ വരുമാന വളർച്ച രേഖപ്പെടുത്തിയ ഡിജിറ്റൽ (ജിയോ) പ്രവർത്തന ലാഭം 11 ശതമാനം ഉയർന്ന് 14,261 കോടി രൂപയായി. 2016-ൽ ആരംഭിച്ച ജിയോയ്ക്ക് 2023 ഡിസംബർ 31-ന് ഏകദേശം 471 ദശലക്ഷം ഉപഭോക്താക്കളുണ്ട്. കൂടാതെ അതിന്റെ നെറ്റ്‌വർക്കിൽ ഡാറ്റയും വോയ്‌സ് ട്രാഫിക്കും 32 ശതമാനവും 8 ശതമാനവും വളർച്ച കൈവരിച്ചു.

"JioBharat ഫോണിന്റെയും JioAirFiber സേവനങ്ങളുടെയും ശക്തമായ വരവ്, ജിയോയുടെ വരിക്കാരുടെ എണ്ണം തുടർച്ചയായി വിപുലീകരിക്കുന്നതിന് കാരണമായി. ഇത് ഡിജിറ്റൽ സേവന ബിസിനസിന്റെ മികച്ച വളർച്ചയ്ക്ക് കാരണമായി," ചെയർമാനും എംഡിയുമായ മുകേഷ് അംബാനി പറഞ്ഞു.

ചില്ലറ വ്യാപാരത്തിന്റെ പ്രവർത്തന ലാഭം 31 ശതമാനം ഉയർന്ന് 6,271 കോടി രൂപയിലെത്തി. 2023 ഡിസംബർ 31-ന് റിലയൻസ് റീട്ടെയിലിന് 18,774 ഔട്ട്‌ലെറ്റുകൾ ഉണ്ട്.