റിയോ ഡി ജനീറോ: റെക്കോര്‍ഡുകളുടെ പരമ്പര സൃഷ്ടിച്ച് ഒളിംപിക് ഭാരോദ്വഹന പോരാട്ടങ്ങള്‍ക്ക് തിരശ്ശീല വീണു. അവസാന ദിനത്തില്‍ നടന്ന പുരുഷന്‍മാരുടെ 105 കിലോയിലധികം ഭാരമുയര്‍ത്തുന്ന പോരില്‍ ജോര്‍ജിയയുടെ ലഷ തലഖാസെ ലോക റെക്കോര്‍ഡ് തിരുത്തി സുവര്‍ണ താരമായി. 16 വര്‍ഷം പഴക്കമുള്ള ലോക റെക്കോര്‍ഡാണ് തലഖാസെ തിരുത്തിയത്. ഈയിനത്തില്‍ വെങ്കലവും മറ്റൊരു ജോര്‍ജിയന്‍ താരത്തിനാണ്. ഇരക്ലി ടുര്‍മന്‍ഡിസെയാണ് മൂന്നാം സ്ഥാനത്തെത്തി വെങ്കലത്തിനര്‍ഹനായത്. രണ്ടാം സ്ഥാനത്തെത്തി വെള്ളി മെഡല്‍ നേടിയത് അര്‍മേനിയയുടെ ഗോര്‍ മിന്‍സ്യാനാണ്. റിയോയില്‍ അര്‍മേനിയ സ്വന്തമാക്കുന്ന രണ്ടാമത്തെ വെള്ളി മെഡല്‍ കൂടിയാണിത്.

മൊത്തം 473 കിലോ ഉയര്‍ത്തിയാണ് ലഷ തലഖാസെ ലോക റെക്കോര്‍ഡോടെ സ്വര്‍ണം സ്വന്തമാക്കിയത്. 16 വര്‍ഷം മുന്‍പ് ഇറാന്‍ താരം ഹുസൈന്‍ റെസസദെ സ്ഥാപിച്ച 472 കിലോയുടെ റെക്കോര്‍ഡാണ് പഴങ്കഥയായത്. 2004ലെ ഏതന്‍സ് ഒളിംപിക്‌സ് ഭാരോദ്വഹനത്തില്‍ ജോര്‍ജി അസാനിഡ്‌സെ സ്വര്‍ണം സ്വന്തമാക്കിയ ശേഷം ആദ്യമായാണ് മറ്റൊരു ജോര്‍ജിയന്‍ താരത്തിന്റെ സുവര്‍ണ നേട്ടം.

കഴിഞ്ഞ ലണ്ടന്‍ ഗെയിംസില്‍ ഈയിനത്തില്‍ സ്വര്‍ണം സ്വന്തമാക്കിയ ഇറാന്റെ ബെഹ്ദാദ് സലിമികോര്‍ദസിയാബിക്ക് ഇത്തവണ മെഡലൊന്നും നേടാന്‍ സാധിച്ചില്ല. ക്ലീന്‍ ആന്‍ഡ് ജര്‍ക്കില്‍ അവസാന അവസരത്തില്‍ പിന്നോക്കം പോയതാണ് താരത്തിനു തിരിച്ചടിയായത്. അവസാന ദിനത്തിലെ ലോക റെക്കോര്‍ഡോടക്കം ഭാരോദ്വഹന വേദിയില്‍ മൂന്നു വീതം ലോക, ഒളിംപിക് റെക്കോര്‍ഡുകളാണ് പിറന്നത്.