ദോഹ: ഗള്‍ഫ് രാജ്യങ്ങളെ ഇറാനുമായി നയതന്ത്രബന്ധം സ്ഥാപിക്കാന്‍ പ്രേരിപ്പിച്ച് ഖത്തര്‍. ഇക്കാര്യത്തില്‍ ചര്‍ച്ച നടത്തുന്നതിന് മധ്യസ്ഥത വഹിക്കാനുള്ള സന്നദ്ധതയും ഖത്തര്‍ പ്രകടിപ്പിച്ചു. ഇറാനുമായി ഒരു പ്രമുഖ പ്രകൃതിവാതക പാടം പങ്കിടുന്ന രാജ്യമായ ഖത്തര്‍ വര്‍ഷങ്ങളായി ഇറാനുമായി ചര്‍ച്ചയ്ക്ക് ഗള്‍ഫ് രാജ്യങ്ങളെ പ്രേരിപ്പിച്ചുവരുകയാണ്.

 

ഇക്കാര്യത്തില്‍ ഖത്തറിന് പ്രതീക്ഷയുണ്ടെന്ന് വിദേശകാര്യ മന്ത്രി ശൈഖ് മുഹമ്മദ് ബിന്‍ അബ്ദുറഹിമാന്‍ പറഞ്ഞു.അതേസമയം ഇറാന്റെ കടുത്ത ശത്രുവായ സഊദി ഇതുവരെ ഇറാനുമായി ചര്‍ച്ചയ്ക്ക് താല്‍പര്യം പ്രകടിപ്പിച്ചിട്ടില്ല. ഇറാന്റെ ആണവായുധ-ബാലിസ്റ്റിക് മിസൈല്‍ ഭീഷണി നേരിടാന്‍ ഗള്‍ഫ് രാജ്യങ്ങള്‍ ഒന്നിക്കണമെന്നാണ് ഖത്തറിനെതിരായ ഉപരോധം അവസാനിപ്പിച്ച ജി.സി.സി ഉച്ചകോടിയില്‍ സഊദി കിരീടാവകാശി പറഞ്ഞത്.