കൊല്ലം: ഡിസ്ട്രിക്ട് ഡെവല്പമെന്റ് കോഡിനേഷന്‍ ആന്‍ഡ് മോണിറ്ററിങ് കമ്മിറ്റി (ദിഷ) യുടെ പ്രഥമയോഗം കൊല്ലം ആശ്രാമം ഗസ്റ്റ് ഹൗസില്‍ എന്‍.കെ പ്രേമചന്ദ്രന്‍ എം.പി ഉദ്ഘാടനം ചെയ്തു.  
കേന്ദ്രാവിഷ്‌കൃത പദ്ധതികള്‍ സമയബന്ധിതമായി പൂര്‍ത്തീകരിക്കാന്‍ പരിശ്രമിക്കണമെന്നും പ്രധാനമന്ത്രി ഗ്രാമീണ്‍ സഡക്ക് യോജന ഉള്‍പ്പെടെയുള്ള പ്രവൃത്തികളില്‍ ജനപ്രതിനിധികളുടെ പ്രാധിനിധ്യം ഉറപ്പാക്കണമെന്നും അദ്ദേഹം പറഞ്ഞു. തൊഴിലുറപ്പ് പദ്ധതിയില്‍ ഉള്‍പ്പെടുത്തി പരമാവധി ആസ്തിവികസനം ഉറപ്പു വരുത്തണമെന്നും പദ്ധതി നടത്തിപ്പുമായി ബന്ധപ്പെട്ട് സുതാര്യമായ നടപടി ക്രമങ്ങള്‍ പാലിക്കണമെന്നും എം.പി നിര്‍ദേശിച്ചു. ജില്ലയിലെ 29 കേന്ദ്രാവിഷ്‌കൃത പദ്ധതികളാണ് യോഗത്തിന്റെ പരിഗണനയ്ക്കായി സമര്‍പ്പിച്ചത്. തൊഴിലുറപ്പ്, കുടുംബശ്രീ, നാഷനല്‍ ഹെല്‍ത്ത് മിഷന്‍, പി.എം.ജി.എസ്.വൈ, സര്‍വശിക്ഷാ അഭിയാന്‍, സ്വഛ്ഭാരത് മിഷന്‍, പി.എം.എ.വൈ തുടങ്ങിയ പ്രധാന പദ്ധതികള്‍  യോഗം ചര്‍ച്ച ചെയ്തു.
കേന്ദ്രാവിഷ്‌കൃത പദ്ധതികളുടെ മാസത്തിലുള്ള പുരോഗതി അവലോകനം ചെയ്യാനും മൂന്നു മാസത്തിലൊരിക്കല്‍ ദിഷയുടെ യോഗം ചേരാനും ധാരണയായി. സ്വഛ്ഭാരത് മിഷന്‍ പ്രവര്‍ത്തനങ്ങളില്‍ ഖരമാലിന്യ നിര്‍മാര്‍ജനത്തിനും പൊതുശുചീകരണ സംവിധാനത്തിനും  പ്രാമുഖ്യം നല്‍കണമെന്നും  യോഗം വിലയിരുത്തി. നടപ്പ് സാമ്പത്തിക വര്‍ഷത്തില്‍ 19647 കുടുംബങ്ങള്‍ക്കായുള്ള  ഗ്രാമീണ തൊഴില്‍ പദ്ധതി നിര്‍വഹണവും യോഗം ചര്‍ച്ച ചെയ്തു. കുടുംബശ്രീയുടെയും പ്രധാനമന്ത്രി ഗ്രാമീണ്‍ ആവാസ് യോജനയുടെയും ദേശീയ ഉപജീവന മിഷന്റെയും ഗുണഭോക്താക്കള്‍ക്ക് വായ്പ നല്‍കുന്ന കാര്യത്തില്‍ ബാങ്കുകള്‍ കൂടുതല്‍ ഉദാരമായ സമീപനം സ്വീകരിക്കണമെന്നും യോഗം ആവശ്യപ്പെട്ടു.