നിലമ്പൂര്‍: നിലമ്പൂരിലെ ഓട്ടോറിക്ഷകളും ഇനി സ്മാര്‍ട്ട്. നിലമ്പൂരില്‍ പെര്‍മിറ്റുള്ള മുഴുവന്‍ ഓട്ടോറിക്ഷകളുടെയും വിവരം ഇനി ഇന്റര്‍നെറ്റില്‍ ലഭ്യമാകും. അനധികൃതമായി ഓടുന്ന ഓട്ടോകളെ തടയുന്നതിനും നാട്ടുകാരുടെയും ഓട്ടോതൊഴിലാളികളുടെയും സുരക്ഷ മുന്‍നിര്‍ത്തി നിലമ്പൂര്‍ പൊലിസും മുനിസിപ്പല്‍ സംയുക്ത ഓട്ടോ തൊഴിലാളി കമ്മിറ്റിയും ചേര്‍ന്ന് സ്‌റ്റേഷന്‍ നമ്പര്‍ നല്‍കുകയും പ്രസ്തുത ഓട്ടോറിക്ഷയുടെ മുഴുവന്‍ വിവരങ്ങളും വെബ്‌സൈറ്റില്‍ ലഭ്യമാക്കുകയും ചെയ്യും.
വെബ്‌സൈറ്റ് സമര്‍പ്പണം നാളെ രാവിലെ പത്തിന് പീവീസ് ഓഡിറ്റോറിയത്തില്‍ നിലമ്പൂര്‍ പി.വി അന്‍വര്‍ ഉദ്ഘാടനം ചെയ്യും. നഗരസഭ ചെയര്‍പേഴ്‌സണ്‍ പത്മിനി ഗോപിനാഥ് അധ്യക്ഷയാകും. നിലമ്പൂര്‍ സി.ഐ കെ.എം ദേവസ്യ റോഡ് സുരക്ഷാ പ്രതിജ്ഞ ചൊല്ലിക്കൊടുക്കും. നിലമ്പൂര്‍ ജോയിന്റ് ആര്‍.ടി.ഒ കെ.സി മാണി റോഡ് സുരക്ഷാ ക്ലാസെടുക്കും. എസ്.ഐ മനോജ് പറയറ്റ വെബ്‌സൈറ്റിന്റെ പ്രവര്‍ത്തനങ്ങള്‍ വിശദീകരിക്കും. ഒട്ടോറിക്ഷ ഓട്ടം വിളിക്കുന്നതിനും ഈ വെബ്‌സൈറ്റ് ഉപയോഗപ്പെടുത്താം. എല്ലാ ഓട്ടോ തൊഴിലാളികളും ഒറിജിനല്‍ പെര്‍മിറ്റുമായി പങ്കെടുക്കണം. പെര്‍മിറ്റ് വിതരണം നാളെ മാത്രമേ ഉണ്ടാകുകയുള്ളൂവെന്നും പൊലിസ് അറിയിച്ചു.