തിരുവനന്തപുരം
പണിമുടക്കിനോട് അനുബന്ധിച്ചുണ്ടായ സംഭവങ്ങൾക്കെതിരേ നിലപാട് വ്യക്തമാക്കി പ്രതിപക്ഷ നേതാവ് വി.ഡി സതീശൻ. റോഡിലിറങ്ങുന്നവന്റെ കരണത്തടിക്കാനും തലയിൽ തുപ്പാനും ആർക്കും സ്വാതന്ത്ര്യമില്ലെന്നും ജനങ്ങളെ വെല്ലുവിളിച്ചാൽ ഏതു ട്രേഡ് യൂനിയനായാലും അംഗീകരിക്കില്ലെന്നും സതീശൻ മാധ്യമങ്ങളോട് പറഞ്ഞു.
മനുഷ്യന്റെ മൗലികാവകാശങ്ങൾ നിഷേധിക്കുന്ന എല്ലാ സമരപരിപാടികൾക്കും എതിരായ നിലപാടാണ് പ്രതിപക്ഷത്തിന്റേത്. പണിമുടക്കിൽ ഇഷ്ടമുള്ളവർക്ക് പണിമുടക്കാം. ആരെയെങ്കിലും നിർബന്ധിച്ചോ ഭീഷണിപ്പെടുത്തിയോ പണിമുടക്കിപ്പിക്കുന്ന നിലപാടിനോട് യോജിപ്പില്ലെന്നും അദ്ദേഹം സൂചിപ്പിച്ചു.
എതിരായി വാർത്ത വന്നാൽ മാധ്യമ സ്ഥാപനങ്ങൾക്ക് മുന്നിലേക്ക് സമരം നടത്തുന്നതിനോട് യോജിക്കാനാകില്ല. ഐ.എൻ.ടി.യു.സി നേതാക്കളുമായി ഇക്കാര്യം സംസാരിക്കും. ഇനി ഇത്തരം പണിമുടക്കുകൾ വന്നാൽ ഐ.എൻ.ടി.യു.സിക്ക് കൃത്യമായ നിർദേശം നൽകും. പണിമുടക്കിന് ഒരു പ്രശ്‌നവുമില്ല.
അത് ബന്ദിലേക്കും ഹർത്താലിലേക്കും മാറുന്നതാണ് പ്രശ്‌നം. കോൺഗ്രസുകാരായ ആരെങ്കിലും ജനങ്ങൾക്കുമേൽ കുതിരകയറിയിട്ടുണ്ടെങ്കിൽ അവർക്കെതിരേ നടപടിയുണ്ടാകുമെന്നും സതീശൻ കൂട്ടിച്ചേർത്തു.