ദുബൈ: ദുബൈയിൽ നിന്ന്​ കൊച്ചിയിലേക്ക്​ എത്തേണ്ട സ്‌പൈസ് ജെറ്റ് വിമാനം ദുബൈയിൽ നിന്ന് ഇതുവരെ പുറപ്പെട്ടില്ല. ഇന്ന് ഉച്ചക്ക് 12.10ന്​​ പുറപ്പെടേണ്ട വിമാനമാണ് ഇതുവരെ പുറപ്പെടാത്തത്‌. സാങ്കേതിക തകരാറാണ് വിമാനം വൈകാൻ കാരണമായി പറയുന്നത്. 150 ഓളം യാത്രക്കാർ ഇതോടെ ബുദ്ധിമുട്ടിലായി​.

വിമാനം വൈകിയതോടെ താമസം അടക്കം ബദൽ സൗകര്യം നൽകുന്നില്ലെന്ന പരാതി ഉന്നയിക്കുകയാണ് യാത്രക്കാർ. റൂം നൽകാത്തതിനാൽ രാത്രി വിമാനത്താവളത്തിലോ ഹോട്ടലിലോ കഴിഞ്ഞുകൂടേണ്ട അവസ്ഥയിലാണ്​ യാത്രക്കാർ.

അതേസമയം, ഇന്ന് ഉച്ചക്ക് 12.10ന്​​ പുറപ്പെടേണ്ട വിമാനം ബുധനാഴ്ച രാവിലെ 7.30ന്​ പുറപ്പെടും എന്നാണ്​ ഒടുവിൽ നൽകുന്ന അറിയിപ്പ്​. യന്ത്രത്തകരാർ പരിഹരിക്കാനുള്ള ശ്രമങ്ങൾ പുരോഗമിക്കുന്നെന്നാണ് വിവരം.

കഴിഞ്ഞ ദിവസം ഷാർജയിൽ നിന്ന്​ കോഴിക്കോട്ടേക്കുള്ള എയർ ഇന്ത്യ വിമാനം തകരാറിനെ തുടർന്ന്​ തിരിച്ചിറക്കിയിരുന്നു. 38 മണിക്കൂറിന്​ ശേഷമാണ്​ ഈ വിമാനത്തിലെ യാത്രക്കാരെ നാട്ടിലേക്ക്​ അയച്ചത്​.