ചേവായൂര്‍: കോഴിക്കോട് മെഡിക്കല്‍ കോളജില്‍ ആര്‍.എസ്.ബി.വൈ യൂനിറ്റിലേക്ക് ഒഴിവുള്ള തസ്തികയില്‍ ഇന്റര്‍വ്യൂ നടക്കവേ യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധവുമായി എത്തിയത് അധികൃതരും പരീക്ഷാര്‍ഥികളും തമ്മില്‍ വാക്കേറ്റത്തിനിടയായി.
ഒരു അക്കൗണ്ടന്റിന്റെ ഒഴിവുണ്ടെന്നു കാണിച്ച് ആശുപത്രി അധികൃതര്‍ പരസ്യം നല്‍കിയതിനെത്തുടര്‍ന്നാണ് ഉദ്യോഗാര്‍ഥികള്‍ എത്തിയത്.
എന്നാല്‍ നേരത്തേ പരീക്ഷയെഴുതിയ നാല്‍പത്തിമൂന്ന് പേരുടെ ലിസ്റ്റ് നിലവിലിരിക്കേ അതില്‍ നിന്നും നിയമനം നടത്താതെ സ്വന്തക്കാരെ തിരുകിക്കയറ്റാന്‍ അധികൃതര്‍ ശ്രമിക്കുന്നുവെന്നാരോപിച്ചായിരുന്നു യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധവുമായെത്തിയത്.
സംഭവത്തില്‍ പരുക്കേറ്റ നാലു യൂത്ത് കോണ്‍ഗ്രസ് പ്രവര്‍ത്തകരെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
യൂത്ത് കോണ്‍ഗ്രസ് കോഴിക്കോട് ബ്ലോക്ക് ജനറല്‍ സെക്രട്ടറി ഷിബു, എരഞ്ഞിപ്പാലം മണ്ഡലം സെക്രട്ടറി അതുല്‍, കോഴിക്കോട് നോര്‍ത്ത് മണ്ഡലം സെക്രട്ടറി അശ്വിന്‍ ചെലവൂര്‍ മണ്ഡലം സെക്രട്ടറി സുമന്‍ എന്നിവര്‍ക്കാണ് പരുക്കേറ്റത്.