ഹൈദരാബാദ്
കോൺഗ്രസിനെ പുനരുജ്ജീവിപ്പിക്കാനുള്ള പദ്ധതികളുമായി ഏതാനും ദിവസമായി നേതൃത്വവുമായി ചർച്ച നടത്തുന്ന തെരഞ്ഞെടുപ്പ് തന്ത്രജ്ഞൻ പ്രശാന്ത് കിഷോർ തെലങ്കാന മുഖ്യമന്ത്രി കെ. ചന്ദ്രശേഖർ റാവുവുമായും ചർച്ച നടത്തി. നേരത്തെ റാവുവിന്റെ നേതൃത്വത്തിൽ ബി.ജെ.പിക്ക് എതിരായ മൂന്നാം ബദൽ ചർച്ചകൾ നടന്നിരുന്നു. ഈ സാഹചര്യത്തിലാണ് പ്രശാന്ത് കിഷോർ ഹൈദരാബാദിലെത്തി കെ.സി.ആറിനെ അദ്ദേഹത്തിന്റെ ഔദ്യോഗിക വസതിയായ പ്രഗതി ഭവനിൽ സന്ദർശിച്ചത്. പുതിയ രാഷ്ട്രീയ സാഹചര്യത്തിൽ കോൺഗ്രസാണോ തെലങ്കാന രാഷ്ട്രസമിതി (ടി.ആർ.എസ്) ആണോ മുന്നണിയെ നയിക്കുക എന്നതാണ് പ്രധാന ചർച്ചാവിഷയം. ശനിയാഴ്ച രാവിലെ തുടങ്ങിയ ചർച്ച ഞായറാഴ്ചയും തുടർന്നു. നേരത്തെ ഹൈദരാബാദിൽ നിന്ന് 62 കി.മീ അകലെ ഇരവെല്ലിയിലെ ഫാം ഹൗസിലും ഇരുവരും കൂടിക്കാഴ്ച നടത്തിയിരുന്നു. അടുത്ത വർഷം തെലങ്കാന സംസ്ഥാന തെരഞ്ഞെടുപ്പിലും 2024 ൽ നടക്കാനിരിക്കുന്ന ലോക്സഭ തെരഞ്ഞെടുപ്പിലും സ്വീകരിക്കേണ്ട തന്ത്രങ്ങളാണ് പ്രധാന ചർച്ചാ വിഷയമായത്. തെലങ്കാനയിൽ കോൺഗ്രസാണ് പ്രധാന പ്രതിപക്ഷം.