ലഖ്‌നോ: ഉത്തര്‍പ്രദേശിലെ ജയിലിലുണ്ടായ വെടിവെപ്പില്‍ മൂന്നു തടവുകാര്‍ കൊല്ലപ്പെട്ടു. രാവിലെ 10 മണിയോടെ ചിത്രകൂടിലെ ജില്ല ജയിലിലാണ് സംഭവം. രണ്ടു പേരെ തടവുകാരിലൊരാള്‍ തന്നെയാണ് വെടിവെച്ച് കൊലപ്പെടുത്തിയത്. പിന്നാലെ ആക്രമണം നടത്തിയ തടവുകാരനെ പൊലിസ് വെടിവെക്കുകയുമായിരുന്നു.

പടിഞ്ഞാറന്‍ യു.പിയിലെ ഗുണ്ടാത്തലവനായ മുകീം കാല, കിഴക്കന്‍ യു.പി ഡോണായ മിറാസുദ്ദീന്‍ എന്നിവര്‍ക്ക് നേരെയാണ് തടവുകാരിലൊരാള്‍ വെടിയുതിര്‍ത്തത്. വിചാരണ തടവുകാരനായ അന്‍സുല്‍ ദീക്ഷിതാണ് ഇരുവരെയും കൊലപ്പെടുത്തിയത്. പിന്നീട് അന്‍സുലിനെ എന്‍കൗണ്ടറിലൂടെ വധിക്കുകയായിരുന്നുവെന്ന് പൊലിസ് വ്യക്തമാക്കുന്നു.

പടിഞ്ഞാറന്‍ യു.പിയിലെ ഗുണ്ടാത്തലവനാണ് കാലാ. ഷമ്‌ലി, മുസഫര്‍നഗര്‍, പടിഞ്ഞാറന്‍ യു.പി എന്നിവിടങ്ങള്‍ അടക്കി ഭരിച്ചിരുന്ന കാലാ നിരവധി കേസുകളില്‍പ്പെട്ട് ജയിലിലാകുകയായിരുന്നു. ഫെബ്രുവരിയില്‍ കാല ജയിലില്‍ കൊല്ലപ്പെട്ടേക്കാമെന്ന് ചൂണ്ടിക്കാട്ടി കാലയുടെ മാതാവ് അലഹബാദ് ഹൈക്കോടതിയില്‍ പരാതി നല്‍കിയിരുന്നു. തുടര്‍ന്ന് ജയിലില്‍ സുരക്ഷ വര്‍ധിപ്പിക്കുകയും ചെയ്തിരുന്നു.