കാസര്‍കോട്: ഷിഗെല്ല വ്യാപന ആശങ്കയെ തുടര്‍ന്ന് കാസര്‍കോട് ജാഗ്രതാ നടപടികള്‍ ശക്തമാക്കി ആരോഗ്യവകുപ്പ്. ഷവര്‍മ കഴിച്ച് ആശുപത്രിയിലായവര്‍ക്ക് ഭക്ഷ്യവിഷബാധ ഏല്‍ക്കാന്‍ കാരണം ഷിഗെല്ലാ ബാക്ടീരിയ ആണെന്ന് ഇന്നലെ സ്ഥിരീകരിച്ചിരുന്നു.

രോഗബാധ സ്ഥിരീകരിച്ച നാല് കുട്ടികള്‍ക്ക് അനുഭവപ്പെട്ട ലക്ഷണങ്ങള്‍ തന്നെയാണ് ചികിത്സയിലുള്ള മറ്റ് കുട്ടികള്‍ക്കും എന്നതിനാല്‍ കൂടുതല്‍ പേര്‍ക്ക് രോഗബാധയുണ്ടാകാന്‍ സാധ്യതയുണ്ടെന്നാണ് ആരോഗ്യവകുപ്പിന്റെ നിഗമനം. 57ഓളം പേരാണ് ഭക്ഷ്യവിഷബാധയേറ്റ് വിവിധ ആശുപത്രികളിലായി ചികിത്സയിലുള്ളത്.

വയറിളക്കം, പനി, വയറുവേദന, നീര്‍ജ്ജലീകരണം, ക്ഷീണം തുടങ്ങിയ ലക്ഷണങ്ങള്‍ ഉണ്ടെങ്കില്‍ ഉടന്‍ ചികിത്സ തേടണമെന്ന് ആരോഗ്യ വകുപ്പ് നിര്‍ദേശം നല്‍കിയിട്ടുണ്ട്.

സാധാരണ രണ്ടു മുതല്‍ ഏഴു ദിവസം വരെയാണ് രോഗലക്ഷണങ്ങള്‍ കാണപ്പെടുന്നതെങ്കിലും ചില കേസുകളില്‍ ലക്ഷണങ്ങള്‍ നീണ്ടുനില്‍ക്കുമെന്ന് ആരോഗ്യവകുപ്പ് അറിയിച്ചു. അപൂര്‍വം കേസുകളില്‍ ലക്ഷണങ്ങള്‍ പ്രകടമാകാതിരിക്കും.

കാസര്‍കോട്, കണ്ണൂര്‍ എന്നിവിടങ്ങളിലെ വിവിധ ആശുപത്രികളിലായി ചികിത്സയിലുള്ളവര്‍ പ്രത്യേകം നിരീക്ഷണത്തിലാണ്.