ന്യൂഡല്‍ഹി: മുന്‍ പ്രധാനമന്ത്രി രാജീവ് ഗാന്ധി വധക്കേസില്‍ പ്രതിയാക്കപ്പെട്ട് 30 വര്‍ഷത്തിലേറെയായി തടവില്‍ കഴിയുന്ന പേരറിവാളന് ഒടുവില്‍ മോചനം.പേരവാളനെ വിട്ടയക്കാന്‍ സുപ്രിം കോടതി ഉത്തരവിട്ടു. ഭരണഘടനയുടെ 142ാം അനുഛേദപ്രകാരമാണ് ഉത്തരവ്. സുപ്രിം കോടതി ശിക്ഷയില്‍ ഇളവ് നല്‍കി.

ഭരണഘടനയുടെ 142 പ്രകാരമുള്ള അധികാരം ഉപയോഗിച്ച് മോചനത്തിന് ഉത്തരവിടുന്നുവെന്ന് കോടതി പറഞ്ഞു. ജസ്റ്റിസ് എല്‍. നാഗേശ്വര്‍ റാവു അധ്യക്ഷനായ ബെഞ്ചിന്റേതാണ് വിധി.

നളിനി ശ്രീഹരന്‍, ശ്രീലങ്കന്‍ പൗരനായ ഭര്‍ത്താവ് മുരുകന്‍ എന്നിവരുള്‍പ്പെടെ മറ്റ് ആറ് പ്രതികളുടെ മോചനത്തിനും വിധി വഴിയൊരുക്കും. 19ാമത്തെ വയസിലാണ് പേരറിവാളന്‍ രാജീവ് ഗാന്ധി വധക്കേസില്‍ പിടിയിലാകുന്നത്.

1998ല്‍ ഭീകരവിരുദ്ധ കോടതി പേരറിവാളനെ വധശിക്ഷക്ക് വിധിച്ചിരുന്നു. അടുത്ത വര്‍ഷം, സുപ്രിം കോടതി ശിക്ഷ ശരിവച്ചെങ്കിലും 2014ല്‍ ജീവപര്യന്തമായി ഇളവ് ചെയ്തു. ഈ വര്‍ഷം മാര്‍ച്ചില്‍ സുപ്രിം കോടതി അദ്ദേഹത്തിന് ജാമ്യം അനുവദിച്ചിരുന്നു.

പേരറിവാളന്‍ അറസ്റ്റിലാകുമ്പോള്‍ 19 വയസായിരുന്നു. രാജീവ് ഗാന്ധിയെ കൊല്ലാന്‍ ഉപയോഗിച്ച ബോംബുണ്ടാക്കാന്‍ ആവശ്യമായ ബാറ്ററികള്‍ കൊണ്ടുവന്നു എന്നതാണ് ഇദ്ദേഹത്തിനെതിരെയുള്ള കുറ്റം. ഐ.പി.സി 120 ബി (ഗൂഢാലോചന) , ഐ.പി.സി 320 (കൊലപാതകം) എന്നീ വകുപ്പുകളാണ് പേരറിവാളനെതിരെ ചുമത്തിയിട്ടുള്ളത്.