തിരുവനന്തപുരം:  ന്യൂനപക്ഷ സ്‌കോളര്‍ഷിപ്പിലെ 80:20 അനുപാതം റദ്ദാക്കിയ ഹൈക്കോടതി വിധിയെ ചൊല്ലി  സി.പി.എമ്മില്‍ സര്‍ക്കാരിലും ആശയക്കുഴപ്പം. കോടതിവിധി വന്ന് മൂന്നു  ദിവസമായിട്ടും എന്തു ചെയ്യണമെന്നറിയാതെ ഉഴലുകയാണ് സര്‍ക്കാര്‍.  

സി.പിഎമ്മിലാകട്ടെ, ഭൂരിഭാഗം പേരും കോടതിവിധിയെ എതിര്‍ക്കുമ്പോള്‍  തന്നെ ന്യൂനപക്ഷ വകുപ്പ് മുഖ്യമന്ത്രി കൈകാര്യം ചെയ്യുന്നതിനാല്‍ മുഖ്യമന്ത്രി തന്നെ  അന്തിമതീരുമാനം എടുക്കട്ടെ എന്ന നിലപാടിലാണ്.

ഇരു സമുദായക്കാരെയും ഒപ്പംനിര്‍ത്താനുള്ള ഫോര്‍മുലയില്‍ കുരുങ്ങിക്കിടക്കുകയാണ് പാര്‍ട്ടിയും സര്‍ക്കാരും.

സി.പി.എമ്മില്‍  തന്നെ വിധിയെ ചോദ്യം ചെയ്ത് കോടതിയെ സമീപിക്കണമെന്ന നിലപാട്  ഒരുവിഭാഗം എടുക്കുമ്പോള്‍ ക്രിസ്ത്യന്‍ സമുദായത്തെ പിണക്കാതെ എങ്ങനെ  മുന്നോട്ടുപോകാമെന്ന ചിന്തയിലാണ് മുഖ്യമന്ത്രി. കോടതിവിധിക്കെതിരേ  സി.പി.എം പൊളിറ്റ്ബ്യൂറോ അംഗം എം.എ ബേബി പരസ്യമായി നിലപാട്  സ്വീകരിച്ചപ്പോള്‍ സി.പി.എം കേന്ദ്രകമ്മിറ്റി അംഗം കൂടിയായ മന്ത്രി എം.വി  ഗോവിന്ദന്‍ വിധിയെ ന്യായീകരിച്ച് രംഗത്തെത്തുകയും ചെയ്തു. ഹൈക്കോടതി വിധി  നടപ്പാക്കുമെന്നായിരുന്നു മന്ത്രി എം.വി ഗോവിന്ദന്‍ പറഞ്ഞത്. എന്നാല്‍ പഠിച്ച് നടപടി  എന്താണെന്ന് തീരുമാനിക്കുമെന്നാണ് വകുപ്പ് കൈകാര്യം ചെയ്യുന്ന  മുഖ്യമന്ത്രിയുടെ മറുപടി. ഇതേ ന്യായീകരണം തന്നെയാണ് നിയമമന്ത്രിയായ  പി. രാജീവും പറഞ്ഞത്. 

വിധിയില്‍ അപ്പീല്‍ പോകണമെന്ന് ഇടതുമുന്നണിയ്‌ക്കൊപ്പം നില്‍ക്കുന്ന  ഐ.എന്‍.എല്‍ ആവശ്യപ്പെട്ടിട്ടുണ്ട്. വിഷയം ഇന്നു ചേരുന്ന സി.പി.എം അവൈലബിള്‍ സെക്രട്ടേറിയറ്റ്  ചര്‍ച്ച ചെയ്യും.