നര്‍മദ നദിയില്‍ വെള്ളത്തിന് മുകളിലൂടെ ഒരു സ്ത്രീ നടക്കുന്ന വീഡിയോ അടുത്തിടെ സമൂഹമാധ്യമങ്ങളില്‍ വൈറലായിരുന്നു. നര്‍മദാ ദേവിയുടെ അവതാരമെന്ന് പറഞ്ഞുകൊണ്ട് നിരവധി പേര്‍ ഈ വീഡിയോ ഷെയര്‍ ചെയ്തു. മാത്രമല്ല, നാടിന്റെ പല ഭാഗങ്ങളില്‍ നിന്നും ആളുകള്‍ ഇവരുടെ അനുഗ്രഹം വാങ്ങാനായി എത്തുകയും ചെയ്തു.

മധ്യപ്രദേശിലെ ജബല്‍പൂരിലാണ് സംഭവം നടന്നത്. 'ദൈവീക ശക്തിയുടെ സ്ത്രീ'യുടെ അനുഗ്രഹം വാങ്ങാനായി ആളുകളുടെ തിക്കും തിരക്കും അധികമായതോടെ സ്ത്രീയ്ക്ക് സുരക്ഷ ഏര്‍പ്പെടുത്തേണ്ടതായി വരെ വന്നു.

വ്യാപകമായി വീഡിയോ പ്രചരിച്ചതോടെ പൊലിസ് സംഭവം എന്താണെന്ന് പരിശോധിച്ചു. അപ്പോഴാണ് സത്യകഥ പുറത്തുവന്നത്. ജ്യോതി രഘുവംശി എന്നാണ് ഇവരുടെ പേര്. നര്‍മദാ പുരം സ്വദേശിയായ ഇവര്‍ 10 മാസം മുന്‍പാണ് വീടുവിട്ട് ഇറങ്ങിയത്. പൊലിസ് ഇവരെ സമീപിച്ചപ്പോള്‍ ഇവര്‍ തന്നെ സത്യമെന്തെന്ന് പറയുകയായിരുന്നു.

@saurabhtop @TheLallantop @zoo_bear @ANI
please do fact check and analysis of below..
Location : narmada river, Jabalpur #narmadamata @ChouhanShivraj pic.twitter.com/5IPL8vHx4e

— Maseeeeha (@kedar5gautam) April 8, 2023

വേലിയിറക്ക സമയമായതിനാല്‍ നദിയില്‍ വെള്ളം കുറഞ്ഞിരുന്നു. ഈ സമയം ആഴം കുറഞ്ഞ നദിയിലൂടെ സ്ത്രീ നടന്നപ്പോള്‍ കരയില്‍ നിന്നവര്‍ക്ക് അവര്‍ വെള്ളത്തിലൂടെ നടക്കുന്നതായി തോന്നുകയായിരുന്നു. വെള്ളത്തിന് മുകളിലൂടെയല്ല, വെള്ളത്തിലൂടെ തന്നെയാണ് നടന്നതെന്നും സ്ത്രീ വ്യക്തമാക്കി.

അകലെനിന്ന് എടുത്ത വീഡിയോ ആയതിനാലാണ് ആളുകള്‍ തെറ്റിദ്ധരിക്കപ്പെട്ടതെന്ന് പൊലിസും പറഞ്ഞു.