ഉഡുപ്പി (കർണാടക)
പുതുതായി പണിത റോഡിന് നാഥുറാം ഗോഡ്‌സെയുടെ പേരിട്ട സംഭവത്തിൽ പൊലിസ് കേസെടുത്തു.
ഉഡുപ്പി ജില്ലയിലെ കാർക്കല താലൂക്കിൽ ബൊല പഞ്ചായത്തിൽ പുതുതായി പണികഴിപ്പിച്ച റോഡിനാണ് രാഷ്ട്രപിതാവ് മഹാത്മാഗാന്ധിയെ വധിച്ച ഗോഡ്‌സെയുടെ പേരിട്ടത്. കോൺക്രീറ്റ് സ്ലാബിൽ മഞ്ഞനിറത്തിലുള്ള ബോർഡിൽ കറുത്ത അക്ഷരത്തിലാണ് ഗോഡ്‌സെയുടെ പേരിട്ടത്. ജൂൺ ആറിന് ഈ ബോർഡ് ഗ്രാമപഞ്ചായത്ത് അധികൃതർ നീക്കംചെയ്തിരുന്നു.
ബോർഡ് സമൂഹമാധ്യമങ്ങളിൽ വൈറലായതോടെ യൂത്ത് കോൺഗ്രസ് പ്രവർത്തകർ നടപടിയാവശ്യപ്പെട്ട് പ്രതിഷേധിച്ചു.
ഇവരുടെ പരാതിയെ തുടർന്ന് കർക്കല റൂറൽ പൊലിസാണ് നടപടിയെടുത്തത്. വിവാദം രാഷ്ടീയമായി ഉപയോഗിക്കുകയാണെന്നും സർക്കാരോ പഞ്ചായത്തോ അല്ല ബോർഡ് സ്ഥാപിച്ചതെന്നും കാർക്കല എം.എൽ.എ സനിൽ കുമാർ പറഞ്ഞു.