മലപ്പുറം: സച്ചാര്‍ കമ്മിഷന്‍ റിപ്പോര്‍ട്ട് പൂര്‍ണമായും നടപ്പാക്കാന്‍ സംസ്ഥാന സര്‍ക്കാര്‍ തയ്യാറാവണമെന്ന് മുസ്‌ലിം ലീഗ്. ന്യൂനപക്ഷ സ്‌കോളര്‍ഷിപ്പ് അനുപാതം ഹൈക്കോടതി റദ്ദാക്കിയ സാഹചര്യത്തിലെ തുടര്‍ നടപടികള്‍ക്കായി വിദഗ്ദ്ധ സമിതിയെ നിയമിക്കുക എന്ന അപ്രായോഗികമായ കാര്യമാണെന്നും ഇതിനെ അംഗീകരിക്കാനാവില്ലെന്നും പി.കെ കുഞ്ഞാലിക്കുട്ടിയും ഇ.ടി മുഹമ്മദ് ബഷീറും മലപ്പുറത്ത് പറഞ്ഞു.

അനുപാതം റദ്ദാക്കിയ കോടതി വിധിയില്‍ സര്‍ക്കാര്‍ ഇപ്പോഴും ആശയക്കുഴപ്പത്തിലാണ് ഇത് പ്രശ്‌നം സങ്കീര്‍ണമാക്കുകയാണ്. ഇക്കാര്യം ചര്‍ച്ച ചെയ്യാന്‍ വിളിച്ച സര്‍വകക്ഷിയോഗത്തില്‍ സര്‍ക്കാര്‍ തീരുമാനമൊന്നും എടുത്തിട്ടില്ല. തീരുമാനം നീട്ടിക്കൊണ്ട് പോകുന്നത് അംഗീകരിക്കാന്‍ കഴിയില്ലെന്നും ഇ.ടി മുഹമ്മദ് ബഷീര്‍ എം.പി പറഞ്ഞു.

കോടതി വിധിയോടെ പാലോളി കമ്മീഷന്‍ റിപ്പോര്‍ട്ട് അസാധുവായി. മറ്റ് വിഭാഗങ്ങളിലെ അര്‍ഹരായ പിന്നോക്കാകാര്‍ക്ക് ആനുകൂല്യങ്ങള്‍ നല്‍കുന്നതില്‍ മുസ് ലിം ലീഗ് എതിരല്ല. എന്നാല്‍ അതിനെ സച്ചാര്‍ കമ്മിഷനുമായി കൂട്ടിക്കുഴക്കേണ്ടതില്ലെന്നും കുഞ്ഞാലിക്കുട്ടി പറഞ്ഞു.