ശ്രീനഗര്‍: കശ്മിര്‍ വിഷയത്തില്‍ കേന്ദ്രമന്ത്രി അരുണ്‍ ജെയ്റ്റ്‌ലി രാഷ്ട്രീയം കളിക്കുകയാണെന്ന് കോണ്‍ഗ്രസ്. പ്രശ്‌നം കത്തിനില്‍ക്കുമ്പോള്‍ അവസാനിപ്പിക്കാന്‍ ശ്രമിക്കാതെ വീണ്ടും ജനങ്ങളെ തെരുവിലിറക്കാന്‍ ശ്രമിക്കുന്ന പ്രസ്താവനകളുമായി രംഗത്തെത്തുന്നത് നിര്‍ത്തണമെന്ന് ജമ്മു കശ്മിര്‍ പ്രദേശ് കോണ്‍ഗ്രസ് കമ്മിറ്റി വക്താവ് പറഞ്ഞു.

പ്രശ്‌നം അവസാനിപ്പിക്കാന്‍ വല്ല നിര്‍ദേശങ്ങളും കൈയിലുണ്ടെങ്കില്‍ ബി.ജെ.പി നേതൃത്വം അവതരിപ്പിക്കണം. നേരത്തേ സുരക്ഷാസൈനികരെയും പൊലിസിനെയും എറിയാന്‍ പുസ്തകങ്ങള്‍ക്കു പകരം കല്ലുകള്‍ സഞ്ചിയില്‍ നിറച്ചാണ് വിദ്യാര്‍ഥികള്‍ സ്‌കൂളില്‍ പോകുന്നതെന്ന് ജെയ്റ്റ്‌ലി പറഞ്ഞിരുന്നു.

പഞ്ചാബിലെ കുപ്‌വാര ജില്ലയിലെ സാമിലാപൂരില്‍ സംഘടിപ്പിച്ച ഒരു റാലിയെ അഭിസംബോധന ചെയ്യവെയായിരുന്നു ജെയ്റ്റ്‌ലിയുടെ പ്രസ്താവന.

2008 ലെ അമര്‍നാഥ് അക്രമം മുതല്‍ പാകിസ്താന്‍ ഇന്ത്യയെ അസ്ഥിരപ്പെടുത്താനുള്ള ശ്രമങ്ങള്‍ ശക്തമാക്കുകയാണെന്നും മന്ത്രി ആരോപിച്ചിരുന്നു.