കണ്ണൂര്‍: കോണ്‍ഗ്രസില്‍ ഇനി ഗ്രൂപ്പുകളും ജംബോ കമ്മിറ്റികളും ഉണ്ടാവില്ലെന്ന് കെ.പി.സി.സി പ്രസിഡന്റ് കെ.സുധാകരന്‍ എം.പി. കെ.പി.സി.സി പ്രസിഡന്റായ ശേഷം ആദ്യമായി കണ്ണൂരിലെത്തിയ അദ്ദേഹം മാധ്യമപ്രവര്‍ത്തകരോട് സംസാരിക്കുകയായിരുന്നു.

സംഘടനാ ദൗര്‍ബല്യം പരിഹരിച്ച് കോണ്‍ഗ്രസിനെ അച്ചടക്കമുള്ള സെമികേഡര്‍ പാര്‍ട്ടിയാക്കുകയാണ് ഇനി ലക്ഷ്യം. കോണ്‍ഗ്രസിലെ ഗ്രൂപ്പ് പ്രവര്‍ത്തനം അവസാനിപ്പിക്കും. ഗ്രൂപ്പില്ലാതാക്കണമെന്ന തന്റെ ആശയത്തോട് ഉമ്മന്‍ ചാണ്ടിയും രമേശ് ചെന്നിത്തലയുമടക്കം യോജിച്ചിട്ടുണ്ട്. രണ്ടുവട്ടം നേതാക്കളുമായി ഇതുസംബന്ധിച്ച് ചര്‍ച്ച നടത്തി ധാരണയിലെത്തി. മാറേണ്ടത് മാറുക തന്നെ വേണം. ഇനി ഗ്രൂപ്പ് കളിച്ചാല്‍ പാര്‍ട്ടിയ്ക്ക് നിലനില്‍പില്ല. അഭിപ്രായ പ്രകടനത്തിനും വിമര്‍ശനത്തിനും ഗ്രൂപ്പ് പ്രവര്‍ത്തനം ആവശ്യമില്ല. കഴിഞ്ഞ കാലങ്ങളിലെ ഗ്രൂപ്പ് പ്രവര്‍ത്തനം തിരുത്താന്‍ എല്ലാ നേതാക്കളും ഒരുമിച്ചാണ് തീരുമാനിച്ചത്. അച്ചടക്കം ലംഘിക്കുന്ന രീതി ഇനി കോണ്‍ഗ്രസില്‍ ഉണ്ടാവില്ല. സംസ്ഥാനതലത്തിലും ജില്ലാതലത്തിലും അച്ചടക്ക സമിതിയും അപ്പീല്‍ സമിതിയും ഉണ്ടാകും.
ഡി.സി.സികളുടെ പുന:സംഘടനയ്ക്ക് അഞ്ചംഗ കമ്മിറ്റിയുണ്ടാക്കും. താഴെതട്ടിലുള്ള പ്രവര്‍ത്തകരുമായി ആശയവിനിമയം നടത്തിയാകും പുന:സംഘടന. ഇതിന് ഒരു ഗ്രൂപ്പ് നേതാവിന്റെയും ശുപാര്‍ശയുണ്ടാകില്ലെന്നും സുധാകരന്‍ പറഞ്ഞു.

സമുദായ സംഘടനകളെ വിസ്മരിച്ച് ഒരു രാഷ്ട്രീയ പാര്‍ട്ടിയ്ക്കും മുന്നോട്ടു പോകാനാവില്ല. അവരുടെ പ്രശ്‌നങ്ങളും പരിഹരിക്കപ്പെടണം. അദാനി കണ്ണൂരില്‍ വന്നത് സി.പി.എമ്മിന് കള്ളപ്പണം കൈമാറാനാണ്. മുട്ടില്‍ മരംമുറി പേര്യ മരംമുറി പോലെയുള്ള വന്‍ തട്ടിപ്പാണെന്നും ഇക്കാര്യത്തില്‍ സമഗ്രാന്വേഷണം വേണമെന്നും സുധാകരന്‍ ആവശ്യപ്പെട്ടു.