പുതിയ ഫീച്ചര്‍ അവതരിപ്പിക്കാനൊരുങ്ങി വാട്‌സ് ആപ്പ്

പുതിയ ഫീച്ചര്‍ അവതരിപ്പിക്കുന്ന തിരക്കിലാണ് പ്രമുഖ ഇന്‍സ്റ്റന്റ് മെസേജിങ് ആപ്പായ വാട്‌സ് ആപ്പ്. ജിഫ് ഓട്ടോമാറ്റിക്കായി പ്ലേ ചെയ്യുന്ന ഓപ്ഷനാണ് വാട്‌സ് ആപ്പ് കൊണ്ടുവരാനുദ്ദേശിക്കുന്ന പുതിയ ഫീച്ചര്‍. നിലവില്‍ ഉപയോക്താവ് ടാപ് ചെയ്താല്‍ മാത്രമേ ജിഫ് പ്രവര്‍ത്തിക്കുകയുള്ളു. എന്നാല്‍ ഇനി ചാറ്റുകള്‍ക്കിടയില്‍ സന്ദര്‍ഭാനുസരണം ജിഫ് ഓട്ടോമാറ്റിക്കായി പ്ലേ ചെയ്യും. നിലവില്‍ പരീക്ഷണാടിസ്ഥാനത്തിലാണ് ഈ ഫീച്ചര്‍ അവതരിപ്പിക്കുന്നത്. മെസേജിങ് സേവനം കൂടുതല്‍ മെച്ചപ്പെടുത്തുന്നതിന്റെ ഭാഗമായാണ് നടപടി. ഭാവിയില്‍ എല്ലാവരിലേക്കും ഈ ഫീച്ചര്‍ എത്തിക്കുമെന്നാണ് റിപ്പോര്‍ട്ട്.

അതേ സമയം മറ്റ് നിരവധി ഫീച്ചറുകള്‍ അടുത്തിടെയായി വാട്‌സ്ആപ്പ് അവതരിപ്പിച്ചിട്ടുണ്ട്. ഈ വര്‍ഷം പകുതിയോടടുക്കുമ്പോള്‍ തന്നെ നിരവധി അപ്ഡേഷനുകളാണ് വന്നത്. മീറ്റിങുകളിലോ മറ്റുപല സാഹചര്യങ്ങളിലോ വാട്സ് ആപ്പില്‍ വന്ന വോയിസ് നോട്ട് ഓപ്പണാക്കാന്‍ കഴിയാതെ വരും. അത്തരം സാഹചര്യങ്ങളില്‍ പരിഹാരമെന്ന നിലയിലാണ് വോയിസ് മെസേജ് ട്രാന്‍സ്‌ക്രിപ്റ്റ് ഫീച്ചര്‍ വാട്‌സ് ആപ്പ് അവതരിപ്പിക്കാനൊരുങ്ങുന്നത്. പേര് സൂചിപ്പിക്കുന്നതുപോലെ വോയിസിനെ അനായാസം ടെക്സ്റ്റ് ആക്കി മാറ്റാം.

ഇതിന് പുറമെ റിപ്ലെ വിത്ത് എ മെസേജ് എന്ന വരാനിരിക്കുന്ന വാട്സ്ആപ്പ് ഫീച്ചര്‍ ഉപയോക്താക്കള്‍ക്ക് വാട്സ്ആപ്പ് ഇന്‍കമിംഗ് കോള്‍ എളുപ്പത്തില്‍ റിജെക്റ്റ് ചെയ്യാനും അതേ സമയം വിളിക്കുന്ന ആളിന് മെസേജ് അയക്കാനും സാധിക്കും.

whatsapp introduce new feature