നീലേശ്വരം (കാസര്‍കോട്) പതിനഞ്ച് വര്‍ഷം മുമ്പ് മുഖത്തടിച്ച സുഹൃത്തിനെ പുലര്‍ച്ചെ വീട്ടില്‍ നിന്നും വിളിച്ചിറക്കി രണ്ടുകാലുകളും വെട്ടി പരിക്കേല്‍പ്പിച്ചു. നീലേശ്വരം തെരുവത്തെ പരേതനായ ഗംഗാധരന്റെ മകന്‍ പി.മുരളിയുടെ (46) കാലുകളാണ് സുഹൃത്തുക്കളായ കടഞ്ഞിമൂലയിലെ സുനില്‍, പളളിക്കരയിലെ ദിനേശന്‍ എന്നിവര്‍ ചേര്‍ന്ന് വടിവാള്‍ കൊണ്ട് വെട്ടി പരിക്കേല്‍പ്പിച്ചത്. ഇവര്‍ക്കെതിരെ നീലേശ്വരം പൊലിസ് കേസെടുത്തു. വെട്ടേറ്റ് ഗുരുതരാവസ്ഥയില്‍ കണ്ണൂര്‍ ഗവണ്‍മെന്റ് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ച മുരളിയുടെ ഇരുകാലുകള്‍ക്കും അടിയന്തിര ശസ്ത്രക്രിയ നടത്തി.

ബുധനാഴ്ച്ച പുലര്‍ച്ചെ ഒരു മണിയോടെയാണ് സുനിലും ദിനേശനും ഫോണില്‍ വിളിച്ച് മുരളിയെ വീട്ടില്‍ നിന്നും പുറത്തിറക്കി അഞ്ഞൂറ്റമ്പലം വീരര്‍ കാവ് ക്ഷേത്ര പരിസരത്തേക്ക് കൊണ്ടുപോയി ഇരുകാലുകള്‍ക്കും വെട്ടി പരിക്കേല്‍പ്പിച്ചത്. മുമ്പ് നീ എന്റെ മുഖത്തടിച്ചത് ഓര്‍മ്മയുണ്ടോ എന്ന് ചോദിച്ചായിരുന്നു അക്രമം. തനിക്ക് ഓര്‍മ്മയില്ലെന്ന് മുരളി പറയുമ്പോഴേക്കും അക്രമികള്‍ ഇരുകാലുകള്‍ക്കും മാരകമായി വെട്ടിപരിക്കേല്‍പ്പിച്ചു. അക്രമത്തിനിടയില്‍ തന്നെ വെട്ടാന്‍ ഉപയോഗിച്ച സ്റ്റീല്‍വാള്‍ മുരളി അക്രമികളില്‍ നിന്നും പിടിച്ചു വാങ്ങിയപ്പോള്‍ അക്രമികള്‍ ഓടി രക്ഷപെടുകയായിരുന്നു.