പയ്യോളി: ടൗണില്‍ ബസ് സ്റ്റാന്‍ഡിന്റെ പിന്നിലും പരിസരങ്ങളിലും മാലിന്യക്കൂമ്പാരം. ബസ് സ്റ്റാന്‍ഡിന്റെ പിന്നില്‍ തെക്കു ഭാഗത്തുള്ള മാലിന്യം ചീഞ്ഞുനാറുന്ന അവസ്ഥയിലാണ്. ടൗണിലെത്തുന്ന അധികപേരും മൂത്രമൊഴിക്കാനെത്തുന്നതും ഇവിടെയാണ്. ഇതുവഴി മൂക്കുപൊത്താതെ നടക്കാന്‍ കഴിയില്ല.
ടൗണിന്റെ പിന്നില്‍ പടിഞ്ഞാറു ഭാഗത്തും മാലിന്യം കുന്നുകൂടി കിടക്കുകയാണ്. നേരത്തെ മത്സ്യമാര്‍ക്കറ്റ് പ്രവര്‍ത്തിച്ച ഭാഗങ്ങളില്‍ മാലിന്യം കുമിഞ്ഞുകൂടിയിട്ടുണ്ട്. ഹോട്ടലുകളില്‍ നിന്നും പച്ചക്കറി കടകളില്‍ നിന്നുമെല്ലാം ഇവിടേക്കാണ് മാലിന്യം വലിച്ചെറിയുന്നത്. വിഷയത്തില്‍ നഗരസഭാ അധികൃതരുടെയും ആരോഗ്യ വകുപ്പിന്റെയും ശക്തമായ ഇടപെടലുണ്ടാകണമെന്നാണ് നാട്ടുകാരുടെ ആവശ്യം.