കാഞ്ഞങ്ങാട് • ലഹരിക്കെതിരേ ശക്തമായ നിലപാടുമായി മുന്നോട്ടുപോകുന്ന മഹല്ലിനു പൊലിസിന്റെ പിന്തുണ.
മയക്കുമരുന്നു കടത്തിനും ഉപയോഗത്തിനുമെതിരേ വിവിധ പദ്ധതികൾ ആവിഷ്കരിച്ച കാസർകോട് പടന്നക്കാട് മുഹ് യുദ്ദീന്‍ ജുമാമസ്ജിദ് മഹല്ല് കമ്മിറ്റിയെയാണ് കാഞ്ഞങ്ങാട് ഡിവൈ.എസ്.പി പി. ബാലകൃഷ്ണന്‍ നായരും സംഘവും നേരിട്ടെത്തി അഭിനന്ദനവും പിന്തുണയും അറിയിച്ചത്.

580 കുടുംബങ്ങള്‍ അംഗങ്ങളായുള്ള മസ്ജിദ് മയക്കുമരുന്ന് ഉപയോഗിക്കുന്നവരെയും വിപണനം നടത്തുന്നവരെയും ജമാഅത്തിന്റെ പ്രാഥമിക അംഗത്വത്തില്‍നിന്നു മാറ്റിനിര്‍ത്തുന്നതിനു പുറമെ വിവാഹ കാര്യത്തില്‍ ഉള്‍പ്പെടെ പിന്തുണ നല്‍കുന്നത് നിര്‍ത്തലാക്കുന്നതിനും തീരുമാനിച്ചിരുന്നു.

ഇതിനുപുറമെ ബോധവല്‍ക്കരണ ക്ലാസ് ഉള്‍പ്പെടെയുള്ള പരിപാടികളും മഹല്ല് നേതൃത്വത്തില്‍ നടത്തുന്നുണ്ട്.
ജില്ലാ പൊലിസ് മേധാവി ഡോ. വൈഭവ് സക്‌സേനയുടെ നേതൃത്വത്തില്‍ നടത്തിവരുന്ന ക്ലീന്‍ കാസര്‍കോട് പദ്ധതിക്ക് പിന്തുണ നല്‍കുന്ന മഹല്ല് കമ്മിറ്റി, ലഹരിക്കെതിരേ നടത്തുന്ന ശ്രദ്ധേയവും ശക്തവുമായ ഇടപെടല്‍ ശ്രദ്ധയില്‍പ്പെട്ടതോടെയാണ് മാതൃകാപരമായ തീരുമാനത്തിന് പിന്തുണയുമായി പൊലിസ് എത്തിയത്.
ഡിവൈ.എസ്.പിയുടെ നേതൃത്വത്തില്‍ എത്തിയ പൊലിസ് സംഘത്തില്‍ എസ്.ഐ ആര്‍. ശരത്, എ.എസ്.ഐ അബൂബക്കര്‍, ജനമൈത്രി ബീറ്റ് ഓഫിസര്‍മാരായ കെ. രഞ്ജിത്ത് കുമാര്‍, ടി.വി പ്രമോദ്, സിവില്‍ പൊലിസ് ഓഫിസര്‍മാരായ അമല്‍ ദേവ്, രജില്‍ എന്നിവരും ഉണ്ടായിരുന്നു.