കൊച്ചി: സമുദ്ര ജൈവവൈവിധ്യങ്ങളെക്കുറിച്ചുള്ള ഗവേഷണം ശക്തിപ്പെടുത്തുകയെന്ന ലക്ഷ്യത്തോടെ കേന്ദ്ര സമുദ്ര മത്സ്യ ഗവേഷണ സ്ഥാപനം (സി.എം.എഫ്.ആര്‍.ഐ) തമിഴ്‌നാട്ടിലെ തിരുനല്‍വേലി ആസ്ഥാനമായ മനോന്‍മണിയം സുന്ദരനാര്‍ (എം.എസ്) സര്‍വകലാശാലയുമായി ധാരണാപത്രം ഒപ്പുവച്ചു. സി.എം.എഫ്.ആര്‍.ഐ ഡയരക്ടര്‍ ഡോ.എ ഗോപാലകൃഷ്ണനും എം.എസ് സര്‍വകലാശാല വൈസ്ചാന്‍സലര്‍ ഡോ. കെ ഭാസ്‌കറുമാണ് ധാരണാപത്രത്തില്‍ ഒപ്പുവച്ചത്.

സി.എം.എഫ്.ആര്‍.ഐയുടെ തൂത്തുകുടി ഗവേഷണ കേന്ദ്രവും എം.എസ് സര്‍വകലാശാലയും സംയുക്തമായി മന്നാര്‍ ഉള്‍ക്കടലിലെ പ്രത്യേക ജൈവവൈവിധ്യങ്ങളുടെ സാധ്യതകള്‍ കെണ്ടത്തുന്നതിന് സംയുക്ത ഗവേഷണം നടത്തുന്നതിനാണ് ധാരണാപത്രം ഒപ്പുവെച്ചത്. മന്നാര്‍ ഉള്‍ക്കടലിലെ വിവിധ സസ്യജന്തു വര്‍ഗ്ഗങ്ങളുടെ പ്രജനകാര്‍ഷിക സാങ്കേതിക വിദ്യകള്‍ വികസിപ്പിക്കുന്നതിനുള്ള ഗവേഷണത്തിനും ഈ മേഖലയിലെ മത്സ്യസമ്പത്തിനെക്കുറിച്ചുള്ള പഠനത്തിനും ഇരു സ്ഥാപനങ്ങളും പരസ്പരം സഹകരിക്കും. സി.എം.എഫ്.ആര്‍.ഐ ശാസ്ത്രജ്ഞരെ സര്‍വകലാശാലയിലെ അംഗീകൃത റിസര്‍ച്ച് ഗൈഡുകളായി പരിഗണിക്കുന്നതിനും ധാരണയായിട്ടുണ്ട്. ഇതോടെ, സമുദ്ര ജൈവവൈവിധ്യമേഖലയുമായി ബന്ധപ്പെട്ട് സി.എം.എഫ്.ആര്‍.ഐയില്‍ ഗവേഷണം വിജയകരമായി പൂര്‍ത്തിയാക്കുന്നവര്‍ക്ക് എം.എസ് സര്‍വകലാശാലയില്‍ നിന്ന് പി.എച്ച.്ഡി നേടാനും സാധിക്കും.