വടക്കാഞ്ചേരി: വിവിധ ക്ഷേമ പെന്‍ഷനുകള്‍ വീടുകളിലെത്തിച്ച് നല്‍കുന്ന പദ്ധതി്ക്ക് വടക്കാഞ്ചേരി നഗരസഭയില്‍ തുടക്കമായി. പഴയ പഞ്ചായത്തതിര്‍ത്തിയിലെ ഡിവിഷനുകള്‍ ഉള്‍പ്പെടുന്ന വടക്കാഞ്ചേരി മേഖലാതല ഉദ്ഘാടനം എങ്കക്കാട് സെന്ററില്‍ വെച്ച് നടന്നു. വടക്കാഞ്ചേരി സര്‍വ്വീസ് സഹകരണ ബാങ്കിന്റെ നേതൃത്വത്തിലാണ് പെന്‍ഷനുകള്‍ വീടുകളിലെത്തിച്ച് നല്‍കുന്നത്. ഇതിന് വേണ്ടി പ്രത്യേകം പരിശീലനം നല്‍കിയ 22 കുടുംബശ്രീ അംഗങ്ങളേയും ചുമതലപ്പെടുത്തിയിട്ടുണ്ട്. ഒരു ഡിവിഷന് ഒരാള്‍ എന്ന നിലയിലാണ് ചുമതല എങ്കക്കാട് രായിരത്ത് വീട്ടില്‍ തങ്കമ്മ്ക്ക് പതിനായിരത്തി നാനൂറ് രൂപ നല്‍കി നഗരസഭ സ്ഥിരം സമിതി അധ്യക്ഷന്‍ എന്‍.കെ. പ്രമോദ് കുമാര്‍ ഉദ്ഘാടനം ചെയ്തു. ബാങ്ക് പ്രസിഡന്റ് എന്‍.ടി ബേബി അധ്യക്ഷനായി. പെന്‍ഷന്‍ വിതരണം ചെയ്യുന്ന കുടുംബശ്രീ അംഗങ്ങള്‍ക്കുള്ള തിരിച്ചറിയല്‍ കാര്‍ഡ് സ്ഥിരം സമിതി അധ്യക്ഷന്‍ എം.ആര്‍ സോമനാരായണന്‍ ഉദ്ഘാടനം നിര്‍വ്വഹിച്ചു. കൗണ്‍സിലര്‍ വി.പി മധു എം.എ വേലായുധന്‍, വി.എ അപ്പുമോന്‍ തുടങ്ങിയവര്‍ പ്രസംഗിച്ചു.