വയനാട്ടില്‍ നിന്ന് അമ്മയേയും 5 മക്കളേയും കാണാതായ സംഭവം

കല്‍പ്പറ്റ: വയനാട് കമ്പളക്കാട് നിന്ന്  അമ്മയെയും അഞ്ച് മക്കളെയും കാണാതായ സംഭവത്തില്‍ അന്വേഷണം തുടര്‍ന്ന് പൊലിസ്. കണ്ണൂരില്‍ ഇന്നലെ രാത്രി ബസ് സ്റ്റാന്റില്‍ കണ്ടുവെന്നാണ് ആദ്യം ലഭിച്ച വിവരം.കൂടാതെ ഇവരെ ഇന്ന് ഉച്ചയ്ക്ക് ഷൊര്‍ണൂരില്‍ കണ്ടെന്നും പൊലീസിന് വിവരം ലഭിച്ചു. ഇന്ന് ഉച്ചയ്ക്ക് മൂന്ന് മണിയോടെ ഷൊര്‍ണൂരില്‍ അമ്മയും മക്കളുമടക്കം ആറ് പേരെയും കണ്ടുവെന്നാണ് പൊലീസിന് വിവരം ലഭിച്ചിരിക്കുന്നത്.

കോഴിക്കോട് ചേളാരിയിലെ വീട്ടിലേക്കെന്ന പേരില്‍ അഞ്ച് മക്കളുമായി നാല് ദിവസം മുന്‍പാണ് വിമിജ യാത്ര പുറപ്പെട്ടത്. കഴിഞ്ഞ ദിവസം രാവിലെ അമ്മയും മക്കളും രാമനാട്ടുകരയിലെ ബന്ധുവീട്ടില്‍ എത്തിയിരുന്നു. അവിടെ നിന്ന് ഭക്ഷണം കഴിച്ച് രാവിലെ 11 മണിയോടെ വയനാട്ടിലേക്ക് പോവുകയാണെന്ന് പറഞ്ഞ് ഇറങ്ങി. എന്നാല്‍ നേരെ പോയത് കണ്ണൂരിലേക്കായിരുന്നു. വിമിജയുടെ ഭര്‍ത്താവിന് ഇവിടെയാണ് ജോലി.

രണ്ടുവര്‍ഷമായി വമിജയും മക്കളും പനമരം കൂടോത്തുമ്മലിലുള്ള ഭര്‍ത്താവിന്റെ പെങ്ങളുടെ വീട്ടിലാണ് താമസം. ഇവിടെനിന്ന് വമിജയെ വിവാഹം ചെയ്ത് അയച്ച മലപ്പുറം ചേളാരിയിലെ വീട്ടിലേക്കെന്ന് പറഞ്ഞാണ് പോയിരിക്കുന്നത്. എന്നാല്‍ ഇവര്‍ അവിടെ എത്തിയിട്ടില്ലെന്നാണ് ബന്ധുക്കള്‍ക്ക് വിവരം ലഭിച്ചിരിക്കുന്നത്. മത്സ്യത്തൊഴിലാളിയായ വമിജയുടെ ഭര്‍ത്താവ് ജോലിയുമായി ബന്ധപ്പെട്ട് കണ്ണൂരാണ് താമസം. ചില സമയങ്ങളില്‍ ഇവിടേക്കും മക്കളോടൊപ്പം വമിജ പോകാറുള്ളതായി പറയുന്നു.